ప్రధానమంత్రి నరేంద్రమోడీ.. నేరుగా ఆంధ్రప్రదేశ్‌కు వచ్చే ప్రయత్నాలు విఫలమయ్యాయి. నిజంగానే పని పడిందో… నిఘా నివేదికలే భయపెట్టాయో కానీ… మోడీ.. ఈ నెల ఆరో తేదీన ఏపీకి రావాలనుకున్న పర్యటనను వాయిదా వేసుకున్నారు. కానీ ఏపీ కార్యకర్తలతో మాత్రం మాట్లాడాలని నిర్ణయించుకున్నారు. మోడీ యాప్ ద్వారా ఏపీ బీజేపీ బూత్‌ స్థాయి కార్యకర్తలతో వీడియో కాన్ఫరెన్స్‌ నిర్వహించారు. ఈ కార్యక్రమంలో కాకినాడ, మ‌చిలిప‌ట్నం, న‌ర‌సాపురం, విశాఖ‌ప‌ట్నం, విజ‌య‌న‌గ‌రం లోక్‌సభ స్థానాలకు చెందిన బూత్‌ కమిటీ కార్యకర్తలు పాల్గొన్నారు. వివిధ లోక్‌సభ నియోజకవర్గాల పరిధిలో.. కార్యకర్తలు అడిగిన ప్రశ్నలకు సమాధానాలు ఇచ్చారు.
బీజేపీకి సిట్టింగ్ ఎంపీ ఉన్న విశాఖ పార్లమెంట్ నియోజకవర్గ కార్యకర్తలతో మాట్లాడినప్పుడు.. మోడీ ఏపీపై తీవ్ర విమర్శలు చేశారు. ఏపీ ప్రభుత్వం అసత్యాలను ప్రచారం చేస్తోందని విమర్శించారు. రూ. 20 వేల కోట్ల వరకు రిసోర్స్‌ గ్యాప్‌, రెవెన్యూ డెఫిసిట్‌ ఫండ్‌గా విడుదల చేశామని చెప్పుకొచ్చారు. ఆ డ‌బ్బు ఎవరి జేబుల్లోకి వెళ్ళిందని మోడీ ప్రశ్నించారు. వెనుకబడిన జిల్లాలకు రూ. వెయ్యి కోట్లు ఇచ్చామని, ఏపీ ప్రభుత్వం యుటిలైజేష‌న్ స‌ర్టిఫికెట్లు ఇవ్వలేదని తేల్చేశారు. పోల‌వ‌రాన్ని జాతీయ ప్రాజెక్టుగా తమ ప్రయ‌త్నంతోనే ప్రక‌టించారని, పోలవరానికి వంద‌శాతం కేంద్రం డబ్బులు ఇస్తోందని తెలిపారు. ఇప్పటి వరకు పోలవరానికి రూ. 7 వేల కోట్లు ఇచ్చామని .. ప్రాజెక్ట్‌ను ఏపీ సరిగ్గా నిర్మించలేకపోతోందని… కాగ్‌ చెప్పిందని చెప్పుకొచ్చారు. ప్రధాని హోదాలో మోడీ తమ కార్యకర్తలతో మాత్రమే ఈ వ్యాఖ్యలు చేశారు. నిజానికి ఏపీ ప్రభుత్వం ఈ విధంగా చేసి ఉంటే… ఎలాంటి స్టెప్ వేయడానికైనా… కేంద్రానికి అధికారం ఉంది. కానీ… ప్రధాని స్థాయిలో ఉండి కూడా.. కార్యకర్తల ఎదుట రాజకీయ విమర్శలే చేశారు.
పోలింగ్‌బూత్‌ల వ్యూహాలను.. పార్టీ కార్యకర్తలకు వినిపించారు . 23 పాయింట్లను బూత్‌ కార్యకర్తలు పాటించాలన్నారు. తమ ప్రభుత్వ సంక్షేమ కార్యక్రమాలను కూడా వివరించారు. దేశం లోపలా, బయట భద్రతకు ప్రాధాన్యమిస్తామని చెప్పుకొచ్చారు. కేంద్రంపై ఏపీ ప్రభుత్వం చేస్తున్న ప్రచారాన్ని యువత పట్టించుకోదని, తొలిసారి ఓటు పొందినవారిని కార్యకర్తలు కలుసుకోవాలని మోదీ సూచించారు. ఆరో తేదీన కూడా మరోసారి మిగిలిన పార్లమెంట్ నియోజకవర్గాల కార్యకర్తలతో మాట్లాడతారు.
