హైదరాబాద్:  నైజీరియన్ల మోసాలు రోజురోజుకూ పెరిగిపోతున్నాయి. సాధారణ పౌరులనే ఇప్పటివరకు బుట్టలో పడేసి డబ్బులు దోచేసే నైజీరియన్లు తాజాగా ఏకంగా ప్రభుత్వఖాతానే హ్యాక్ చేసి రు.95 లక్షలు కొల్లగొట్టిన ఘటన వెలుగులోకొచ్చింది. తెలంగాణ మీ-సేవ సర్వీసుల డిప్యూటీ డైరెక్టర్ మధుసూదనరెడ్డి ఈ-మెయిల్‌ను హ్యాక్ చేశారు. మీసేవ నిధులు డిపాజిట్ చేసిఉన్న యాక్సిస్ బ్యాంకుకు మధుసూదనరెడ్డి పంపినట్లుగా 4 మెయిల్స్ పంపి, ఫలానా ఖాతాలలో రు.1.54 కోట్లను జమ చేయాల్సిందిగా కోరారు. బ్యాంక్ అధికారులు అదేవిధంగా ఆ మొత్తాలను జమ చేశారు. గంటల వ్యవధిలోనే ఆ నిధులను నైజీరియన్లు తీసుకునే ప్రయత్నం చేశారు. అయితే ఒక బ్యాంక్‍‌కు చెందిన అధికారులకు అనుమానం వచ్చి రు.30 లక్షలు నిలిపేశారు. మరో బ్యాంక్ అధికారులు హైదరాబాద్‌‍లోని యాక్సిస్ బ్యాంకుకు ఫోన్ చేసి రు.29 లక్షల చెల్లింపులు చెల్లింపులు ఆపాల్సిందిగా అభ్యర్థించటంతో ఆ మొత్తాన్ని ఆపేశారు. అయితే నైజీరియన్లు అప్పటికే రు.95 లక్షలు విత్‌డ్రా చేసేశారు. వీరి ఖాతాలు ఉత్తరప్రదేశ్, ఢిల్లీలలో ఉన్నట్లు తర్వాత తెలిసింది. వీరిని పట్టుకోవటానికి సైబర్ క్రైమ్ ఉన్నతాధికారులు ఢిల్లీ వెళ్ళారు.

మరోవైపు, నైజీరియన్లు ఇటీవల పెళ్ళిసంబంధాల వెబ్‌సైట్లలోకుకూడా దూరి మోసాలు చేస్తున్నట్లు తెలుస్తోంది. లండన్ సిటిజన్, డాక్టర్, ఎన్ఆర్ఐలుగా పరిచయం చేసుకుని హైదరాబాద్, ఢిల్లీ, బెంగళూరులకు చెందిన యువతులను మోసం చేసి రు.77 లక్షలు దోచుకున్న వైనం నిన్న బయటపడింది. ఈ మోసానికి పాల్పడిన ఇద్దరు నైజీరియన్లు, ఒక నాగాల్యాండ్ యువతిని హైదరాబాద్ సైబర్ క్రైమ్ పోలీసులు పట్టుకున్నారు.