న‌టి నివేదా థామ‌స్ కు క‌రోనా సోకింది. ఈ విష‌యాన్ని నివేదా ప్ర‌క‌టించింది. `వకీల్ సాబ్` లో నివేదా ఓ కీల‌క‌పాత్ర చేసింది. ఇటీవ‌ల ప్ర‌మోష‌న్ల‌లోనూ చురుగ్గా పాల్గొంటోంది. ఇప్పుడు త‌న‌కు క‌రోనా సోక‌డంతో వకీల్ సాబ్ టీమ్ మొత్తం టెన్ష‌న్ లో ప‌డింది. గ‌త వారం రోజులుగా త‌ను … వకీల్ సాబ్ టీమ్ తోనే ప్ర‌యాణం చేస్తోంది. ఛాన‌ళ్ల‌కు, మీడియాకు ఇంట‌ర్వ్యూలు ఇస్తోంది. ఈ రోజు కూడా… ప్రింట్ మీడియాకు ఇంట‌ర్వ్యూలు ఏర్పాటు చేశారు. కానీ అవి చివ‌రి నిమిషంలో కాన్సిల్ అయ్యాయి. దాంతో మీడియా ప్ర‌తినిధులు కూడా ఊపిరి పీల్చుకున్నారు. ఒక‌వేళ ఆ ఇంట‌ర్వ్యూ జ‌రిగి ఉంటే – ఈ భ‌యాలు ఇంకొంచెం పెరిగేవి.
వకీల్ సాబ్ టీమ్ అనే కాదు.. చాలా యూనిట్ల‌లో ఈ క‌రోనా భ‌యం ఉంది. ఇటీవ‌ల కొంత‌మంది సినీ సెల‌బ్రెటీలు క‌రోనా బారీన ప‌డ్డార‌ని, అయితే ఆ విష‌యం బ‌య‌ట‌కు చెప్ప‌కుండా గోప్యంగా ఉంచుతున్నార‌ని తెలుస్తోంది. క‌రోనా వ‌స్తోంది.. పోతోంది.. పెద్ద స‌మ‌స్య కాదులే… అని వాళ్లంతా లైట్ తీసుకుంటున్నారా? లేదంటే… బ‌య‌ట‌కు చెప్పుకుని లేనిపోని కంగారు పెంచ‌డం ఎందుక‌ని భ‌య‌ప‌డుతున్నారా? అనేది అర్థం కావ‌డం లేదు. క‌రోనా పాజిటీవ్ అని తెలిస్తే.. బ‌య‌ట‌కు చెప్ప‌డ‌మే మంచిది. ఎందుకంటే.. వాళ్ల‌తో ట‌చ్‌లో ఉన్నవాళ్లంతా చెక్ చేసుకునే అవకాశం ఉంది. ఈ విష‌యం సినీ సెల‌బ్రెటీలు ఎందుకు మ‌ర్చిపోతున్నారో..?
