హ‌మ్మ‌య్య… సంక్రాంతి రిలీజ్ డేట్ల టెన్ష‌న్ వ‌దిలిపోయింది. ‘స‌రిలేరు నీకెవ్వ‌రు’, ‘అల వైకుంఠ‌పుర‌ములో’ సినిమాలు రెండూ ఒకే రోజున ఢీ కొట్టుకుంటాయా? వాటి విడుద‌ల తేదీ విష‌యంలో మార్పు ఉంటుందా? అనే గంద‌ర‌గోళానికి తెర ప‌డింది. ఈ సినిమాల విడుద‌ల తేదీల్లో ఎలాంటి మార్పూ లేదు. ముందు అనుకున్న‌ట్టే 11న స‌రిలేరు, 12న అల వైకుంఠ‌పుర‌ములో విడుద‌ల కాబోతున్నాయి. ఈ విష‌యంలో ప్రొడ్యూస‌ర్ గిల్డ్ ఓ క్లారిటీ ఇచ్చింది.
కాసేప‌టి క్రితం హైద‌రాబాద్‌లోని దిల్ రాజు అత్య‌వ‌స‌ర మీడియా స‌మావేశం ఏర్పాటు చేసి, ఈ విష‌యంలో ఓ క్లారిటీ ఇచ్చారు. రూమ‌ర్ల‌ని న‌మ్మ‌వ‌ద్ద‌ని, ముందు అనుకున్న‌ట్టే, అనుకున్న తేదీల్లోనే సినిమాలు విడుద‌ల అవుతాయ‌న్నారు. సినిమాల విడుద‌ల విష‌యంలో కాస్త గంద‌ర‌గోళం వ‌చ్చిన మాట వాస్త‌వ‌మే అని, అయితే నిర్మాత‌ల‌తో మాట్లాడి ఈ స‌మ‌స్య‌ని పరిష్కరించామని, ముందు అనుకున్న స‌మ‌యంలోనే సినిమాని విడుద‌ల చేయ‌డానికి స‌మ్మ‌తించార‌ని చెప్పారాయ‌న. ఒకేరోజు రెండు సినిమాలు విడుద‌లైతే, దేనికీ స‌రైన వ‌సూళ్లు రావ‌ని, అన్ని సినిమాలూ బాగుండాల‌ని, అన్ని సినిమాల‌కూ మంచి వ‌సూళ్లు రావాల‌ని, అందుకే అంద‌రూ కూర్చుని, ఈ స‌మ‌స్య పరిష్కరించామని చెప్పారు. సో.. సంక్రాంతి రిలీజ్ డేట్ల టెన్ష‌న్ తీరిపోయిన‌ట్టే.
