హైదరాబాద్: భూసేకరణపై తనను ఎద్దేవా చేస్తూ ఏపీ ఆర్థికమంత్రి యనమల రామకృష్ణుడు చేసిన వ్యాఖ్యలపై పవన్ ఘాటుగా స్పందించారు. భూసేకరణ చేయకుండా రాజధాని నిర్మించటానికి ఇదేమీ త్రిశంకు స్వర్గంకాదని, తాము విశ్వామిత్రులం కామని అన్న యనమల వ్యాఖ్యలకు కౌంటర్ ఇస్తూ ముందు కట్టేది స్వర్గమనేది తెలిస్తే, అది త్రిశంకు స్వర్గమా, రెగ్యులర్ స్వర్గమా అనేది తర్వాత ఆలోచించొచ్చని అన్నారు. సినిమా పరిశ్రమకు హైదరాబాద్‌లో ఇచ్చినవి కొండలు…బహుళ పంటలు పండే పొలాలు కాదని, ఇది రామకృష్ణుడికి తెలియదనుకుంటా అని ట్వీట్ చేశారు. హైదరాబాద్ కొండల్లోగానీ, విశాఖపట్నం కొండల్లోలోగానీ తనకు స్టూడియోలు లేవని తెలిపారు. తాను ఎంతో బాధ్యతతో రైతుల సమస్యని ప్రభుత్వం ముందుకు తీసుకెళ్తే విజ్ఞతతో స్పందించటంమానేసి రైతుల ఆవేదనను వెటకారం చేయటం వారికే చెల్లిందని పేర్కొన్నారు. త్వరలో బేతపూడి, ఉండవల్లి, పెనుమాక తదితర నదీ పరీవాహక గ్రామాల రైతులను కలుస్తానని తెలిపారు.
మరోవైపు గుంటూరుజిల్లా మంగళగిరి పట్టణంలో పవన్ ఫోటోకు రైతులు, జనసేన కార్యకర్తలు పాలాభిషేకం చేశారు. రాజధానికోసం భూసేకరణ చేపట్టనున్న సమయంలో భూసేకరణ చట్టం ప్రయోగించొద్దంటూ రాష్ట్ర ప్రభుత్వానికి విజ్ఞప్తి చేసిన నేపథ్యంలో ఈ పాలాభిషేకం నిర్వహించారు.
