ప‌వ‌న్ క‌ల్యాణ్ చేయాల్సిన సినిమాల్లో `పింక్` రీమేక్ ఒక‌టి. దిల్‌రాజు ద‌గ్గ‌ర ఈ రైట్స్ ఉన్నాయి. ప‌వ‌న్ క‌ల్యాణ్‌తో ఈ సినిమా చేయాలని ఆయన త‌హ‌త‌హ‌లాడుతున్నాడు. ప‌వ‌న్ సినిమాల‌కు సిద్ధ‌మైన ఈ నేప‌థ్యంలో పింక్ రీమేక్ మ‌రోసారి చ‌ర్చ‌ల్లోకి వచ్చింది. ప‌వ‌న్ ఈ సినిమాతోనే రీ ఎంట్రీ ఇస్తార‌ని ప్ర‌చారం జ‌రుగుతోంది. అయితే క్రిష్ ఓ క‌థ‌తో సిద్ద‌మైపోవ‌డం, దానికి నిర్మాత (ఎ.ఎం.ర‌త్నం) కూడా రెడీ అయిపోవ‌డంతో.. పింక్ రీమేక్ కంటే ముందు క్రిష్ సినిమానే ప‌ట్టాలెక్కేఛాన్సులు క‌నిపిస్తున్నాయి.
పింక్ రీమేక్ చేసే ఆలోచ‌న ఉన్నా, దానికి స‌రైన రీతిలో దిల్ రాజు స‌న్న‌ద్ధం అవ్వ‌లేద‌ట. ఈ సినిమా కోసం ద‌ర్శ‌కుడ్ని ఇంకా ఎంపిక చేయ‌లేదు. తెలుగులో స్క్రిప్టు ఇంకా రెడీ అవ్వ‌లేదు. ఇవ‌న్నీ అవ‌డానికి మరో నాలుగైదు నెల‌లైనా ప‌డుతుంది. ప్రీ ప్రొడ‌క్ష‌న్‌కి దిల్ రాజు ఎక్కువ స‌మ‌యం తీసుకుంటాడు. పింక్ రీమేక్‌ని ఉన్న‌ది ఉన్న‌ట్టు తీస్తే కుద‌ర‌దు. ఆల్రెడీ ఆ సినిమా అంద‌రూ చూసేశారు. క‌థ అంద‌రికీ తెలుసు. అలాంటప్పుడు క‌థ‌లో మ‌రిన్ని మార్పులు అవ‌స‌రం అవుతాయి. అవ‌న్నీ ప‌క్కాగా జర‌గాలంటే టైమ్ ప‌డుతుంది. అందుకే పింక్ రీమేక్ ఇప్ప‌ట్లో లేనట్టే.
