లాక్ డౌన్ ఎత్తేసి, థియేట‌ర్లు తెర‌చుకుంటే… మొద‌టిగా విడుద‌ల‌య్యే సినిమాల్లో ‘నిశ్శబ్దం’ ఒక‌టి. అనుష్క ప్ర‌ధాన పాత్ర పోషించిన సినిమా ఇది. మాధ‌వ‌న్ లాంటి స్టార్లు ఈ సినిమాకి వెన్నుద‌న్నుగా నిలిచారు. హేమంత్ మ‌ధుక‌ర్ ద‌ర్శ‌క‌త్వం వ‌హించారు. ఈ సినిమాని ఓ టీ టీలో విడుద‌ల చేస్తార‌ని గ‌ట్టిగా ప్రచారం జ‌రిగింది. అయితే.. చిత్ర‌బృందం మాత్రం థియేట‌ర్ల‌లోనే విడుద‌ల చేయ‌డానికి రెడీ అయ్యింది. సెన్సార్ కార్య‌క్ర‌మాలు పూర్తి చేసుకున్న నిశ్శబ్దం ఇప్పుడు విడుద‌ల‌కు రెడీగా ఉంది.
ఈలోగా ‘నిశ్శబ్దం’ చిత్రాన్ని పూరి జ‌గన్నాథ్ కోసం ప్ర‌త్యేకంగా ప్ర‌ద‌ర్శించారు. హేమంత్.. పూరికి బాగా దోస్త్‌. పైగా అనుష్క కావ‌ల్సిన వ్య‌క్తి. అనుష్క‌ని ఇంట్ర‌డ్యూస్ చేసింది పూరి జ‌గ‌న్నాథే. అందుకే ఈ సినిమా చూడ్డానికి పూరి ఆస‌క్తి చూపించాడ‌ని, పూరికి ఈ సినిమా ప్ర‌త్యేకంగా చూపించార‌ని తెలుస్తోంది. సినిమా చూశాక పూరి త‌న‌దైన కొన్ని స‌ల‌హాలు ఇచ్చిన‌ట్టు స‌మాచారం. ఇక `నిశ్శబ్దం` విడుద‌ల తేదీ ప్రక‌టించి, ప్ర‌మోష‌న్లు మొద‌లెట్ట‌డ‌మే బాకీ.
