హైదరాబాద్: దశాబ్దాలుగా భారత్‌లో కార్ల అమ్మకాలలో నంబర్ 1 స్థానంలో ఉన్న మారుతిసంస్థను రెండు నెలలైనా నిండని పసిగుడ్డులాంటి ఒక బుల్లికారు దిమ్మతిరిగిపోయేలా దెబ్బకొడుతోంది. భారత చిన్నకార్ల మార్కెట్‌లో మారుతి రారాజన్న విషయం తెలిసిందే. వారి మారుతి 800, ఆల్టో 800, ఆల్టో కే10 కార్లు ఎన్ని విదేశీ బ్రాండ్‌లొచ్చినా అప్రతిహతంగా ముందంజలో కొనసాగుతున్నాయి. అలాంటి మారుతికి ఫ్రెంచ్ కంపెనీ ‘రెనో’ షాక్ ఇచ్చింది. గత నెలలో లాంచ్ అయిన రెనో క్విడ్ మొదటిరోజునుంచే సూపర్ సక్సెస్ అయింది.
ఫ్రెంచ్ కంపెనీ రెనో, జపాన్ కంపెనీ నిస్సాన్ కలిసి క్విడ్‌ను మూడేళ్ళు కష్టపడి డిజైన్ చేశాయి. ఇది ఒక బుల్లి ఎస్‌యూవీ లాగా కనిపించే హేచ్‌బ్యాక్. ముందునుంచి చూస్తే రెనో వారి సక్సెస్‌ఫుల్ మోడల్ డస్టర్‌లాగా ఉంటుంది. 800 సీసీ పెట్రోల్ ఇంజన్‌తో రూపొందించిన ఈ కారును కేవలం ఇండియన్ మార్కెట్ కోసమే తయారు చేశారు. ప్రత్యర్థి కంపెనీలకంటే సరసమైన ధరకే అందించాలనే ఉద్దేశ్యంతో ఎంట్రీ మోడల్ రేటును రు.2.56 లక్షలుగా నిర్ణయించారు. లోపలి ఫీచర్స్ అన్నీ హైఎండ్ కార్‌లలో ఉండేవి అందించారు. లోపలి స్పేస్ మిగిలిన చిన్న కార్లన్నింటికంటే ఎక్కువ ఉండటం దీని మరో ప్రత్యేకత.
ఇన్ని ప్రత్యేకతలుండటంవలనే క్విడ్ మొదటిరోజునుంచే విజయవంతమైపోయింది. మొదటి రెండువారాలలోనే దేశవ్యాప్తంగా 25,000 బుకింగ్‌లు జరిగాయి. నెలరోజుల తర్వాత చూస్తే, ఇప్పుడు ఆరునెలల వెయిటింగ్ పీరియడ్ ఏర్పడింది. క్విడ్ మారుతి ఆల్టో, హ్యూండాయ్ ఇయాన్ మోడల్స్‌ను తీవ్రంగా దెబ్బతీసింది. ఈ ఆదరణతో ఉత్సాహంలో ఉన్న క్విడ్ తయారీదారులు 1 లీటర్ పెట్రోల్, ఆటోమేటిక్ వంటి మరిన్ని వేరియంట్స్‌ను తీసుకురావాలనుకుంటున్నారు.
