రాజ‌మౌళి ఈమ‌ధ్య బ‌య‌ట ఎక్క‌డా క‌నిపించ‌డం లేదు. ఫంక్ష‌న్ల‌లో మెర‌వ‌డం చాలా త‌క్కువ. సినిమా వేడుక‌ల్లో చూడ‌డం వేళ్ల మీద లెక్క పెట్టొచ్చు. త‌న టైమ్ అంతా మహేష్ బాబు సినిమా కోస‌మే. ‘ఆర్‌.ఆర్‌.ఆర్‌’ త‌ర‌వాత రాజ‌మౌళి చేస్తున్న సినిమా కావ‌డంతో అంచ‌నాలు మ‌రింతగా పెరిగాయి. పైగా… మహేష్ తో ఓ సినిమా చేయాల‌ని జక్కన్న ఎప్ప‌టి నుంచో భావిస్తున్నాడు. అందుకే… త‌న ఫోక‌స్ అంతా… ఈ సినిమాపైనే పెట్టాడు.
అయితే అనుకోకుండా రాజ‌మౌళికి కొంత బ్రేక్ దొరికిందేమో అనిపిస్తోంది. ఎందుకంటే ఈమ‌ధ్య త‌ను సోష‌ల్ మీడియాలో ఎక్కువ‌గా క‌నిపిస్తున్నాడు. ఇటీవ‌ల ఓ కార్య‌క్ర‌మంలో త‌న అర్థాంగితో క‌లిసి ‘ప్రేమికుడు’ పాట‌కు స్టెప్పులు వేశాడు జక్కన్న. ఆ పాట కోసం రిహార్స‌ల్స్ కూడా చేశాడు. అంతేకాదు.. ఇప్పుడు వార్న‌ర్‌తో చేసిన ఓ యాడ్ బ‌య‌ట‌కు వ‌చ్చింది. సాధార‌ణంగా జక్కన్న క‌మ‌ర్షియ‌ల్ యాడ్స్ జోలికి వెళ్ల‌డు. కానీ తొలిసారి అది కూడా చేసేశాడు. ఓ ప‌క్క మహేష్ సినిమా కోసం త‌ల‌మున‌క‌లు అవుతూనే మ‌రోవైపు.. ఇంత టైమ్ ఎలా కేటాయిస్తున్నాడో అర్థం కావ‌డం లేదు. బ‌హుశా.. ప‌ని నుంచి కాస్త బ్రేక్ కావాలంటే మరో ప‌నేదో పెట్టుకోవ‌డం రాజ‌మౌళి స్టైలేమో..? మొత్తానికి రాజ‌మౌళి వార్న‌ర్ యాడ్.. సోష‌ల్ మీడియాలో ఇప్పుడు వైర‌ల్ గా మారింది. ఈ యాడ్‌తో, ప్రేమికుడు స్టెప్పుల‌తో జక్క‌న్న‌లోని టాలెంట్ మరో కోణంలో బ‌య‌ట‌ప‌డింది.
