మరో నాలుగు రోజుల్లో `రాధేశ్యామ్` వ‌చ్చేస్తోంది. ఓ వైపు ప్ర‌మోష‌న్లు జోరు అందుకుంటున్నాయి. ప్ర‌స్తుతానికి ప్రీ రిలీజ్ టాక్ మాత్రం బాగానే ఉంది. దాదాపు 400 కోట్ల‌తో తెర‌కెక్కించిన చిత్ర‌మిది. పాన్ ఇండియా స్థాయిలో భారీగా విడుద‌ల అవుతోంది. ఈ సినిమాకి రాజ‌మౌళి వాయిస్ ఓవ‌ర్ ఇచ్చిన సంగ‌తి తెలిసిందే. రాజ‌మౌళి గొంతుతోనే ఈ సినిమా మొద‌ల‌వుతుంది. ఇటీవ‌లే వాయిస్‌ని రికార్డ్ చేశారు. ఆరోజే… రాజ‌మౌళికి `రాధేశ్యామ్` సినిమా మొత్తం చూపించింద‌ట చిత్రబృందం. రాజ‌మౌళితో పాటు దిల్ రాజు, ఒక‌రిద్ద‌రు సినీ ప్ర‌ముఖులు ఈ సినిమాని చూశార్ట. అవుట్‌పుట్ పై రాజ‌మౌళి పూర్తి సంతృప్తి వ్యక్తం చేశాడ‌ని, అయితే.. అక్క‌డ‌క్క‌డ చిన్న క‌రెక్ష‌న్స్ చెప్పాడ‌ని తెలుస్తోంది. రాజ‌మౌళి లాంటి వాడు స‌ల‌హాలు ఇస్తే తీసుకోకుండా ఎలా ఉంటారు? అందుకే అప్ప‌టిక‌ప్పుడు ఆ క‌రక్ష‌న్స్ కార్య‌క్ర‌మం కూడా చేప‌ట్టిన‌ట్టు తెలుస్తోంది. రాధేశ్యామ్ కోసం ప్ర‌భాస్ – రాజ‌మౌళిల మ‌ధ్య ఓ ఇంట‌ర్వ్యూ కూడా సెట్ చేయాల‌ని చిత్రబృందం భావిస్తోంది. అది సోమ‌వారం పూర్త‌వ్వొచ్చు. ఈ సినిమా ప్ర‌మోష‌న్ల‌లో భాగంగా ఆ ఇంట‌ర్వ్యూని వాడాల‌న్న‌ది చిత్రబృందం ఆలోచ‌న.
రాధే శ్యామ్ చూసిన రాజ‌మౌళి
