టీజర్ టాక్ : నేనే రాజు నేనే మంత్రి

త‌న కెరీర్‌లోనే పీక్ స్టేజ్‌లో ఉన్నాడు రానా. బాహుబ‌లి లాంటి భారీ విజ‌యం ఓ వైపు, ఘాజీ లాంటి ప్ర‌యోగాత్మ‌క విజ‌యాలు మ‌రోవైపు! రానా త‌న కెరీర్‌ని తానే నిర్మించుకోవాల్సిన స‌మ‌యం ఆస‌న్న‌మైపోయింది. ఇప్పుడు మ‌రో హిట్ ప‌డితే.. రానా నిల‌బ‌డిపోవ‌డం ఖాయం. త‌న తాజా చిత్రం `నేనే రాజు నేనే మంత్రి` ఇప్పుడు విడుద‌ల‌కు సిద్ధ‌మైంది. తేజ ద‌ర్శ‌క‌త్వం వ‌హిస్తున్న ఈ చిత్రంలో కాజ‌ల్ క‌థానాయిక‌గా న‌టిస్తోంది. రామానాయుడు జ‌యంతి సంద‌ర్భంగా ‘నేనే రాజు నేనే మంత్రి’ టీజ‌ర్ విడుద‌ల చేశారు. టీజ‌ర్ ఇంట్ర‌స్టింగ్‌గానే క‌ట్ చేశారు. నేనే రాజు నేనే మంత్రి అనే టైటిల్‌కి జ‌స్టిఫికేష‌న్ టీజ‌ర్‌లో క‌నిపించింది. ఇదో పొలిటిక‌ల్ థ్రిల్ల‌ర్‌. ఈ సినిమాలో రానాని ఉరి తీస్తారని ముందు నుంచీ ప్ర‌చారం జ‌రుగుతోంది. అంటే యాంటీ క్లైమాక్స్ అన్న‌మాట‌. ఈ పుకార్ని నిజం చేసేలా ఉన్నాయి టీజ‌ర్‌లో కొన్ని షాట్స్‌. తేజ ఓ హిట్టు కొట్టి త‌న‌ని తాను నిరూపించుకోవాల్సిన త‌రుణ‌మిది. రానా బండి జోరుమీదున్న ఈ స‌మ‌యంలో ఈ సినిమాపై ఆశ‌లు పెట్టుకోవొచ్చేమో అనిపిస్తోంది. చూద్దాం.. ఏం జ‌రుగుతోందో..!