వాలంటీర్లు ప్రభుత్వానికి సేవ చేస్తూ ప్రజలపై అఘాయిత్యాలకు పాల్పడటానికి తమకు అదే లైసెన్స్ అన్నట్లుగా వ్యవహరిస్తున్నారు. రోజు రోజుకు వారి ఆకృత్యాలు వెలుగులోకి వస్తున్నాయి. తాజాగా గుంటూరు జిల్లా మాచవరం మండలం పిల్లు అనే గ్రామ వాలంటీర్ ఏకంగా బాలింతపైనే అత్యాచారయత్నానికి పాల్పడ్డాడు. ప్రభుత్వ పథకానికి సంబంధించి వెరీఫికేషన్ అంటూ ఇంటికి వచ్చాడు. ఇంటి పెద్ద లేరని చెప్పినా వినిపించుకోకుండా లోపలికి వచ్చికూర్చుని ఫోన్ నెంబర్ తీసుకుని మాట్లాడుతున్నట్లుగా నటించి… ఆ బాలింతపై అత్యాచారయత్నానికి పాల్పడ్డాడు. దీంతో ఆమె అక్కడ్నుంచి తప్పించుకుంది. తన భర్తకు సమాచారం ఇచ్చింది. వారు ఇద్దరూ పోలీస్ స్టేషన్‌లో ఫిర్యాదు చేశారు. ఆలస్యంగా వెలుగులోకి వచ్చిన ఈ వ్యవహారం కలకలం రేపుతోంది.
కేసు నమోదైనప్పుడు పట్టించుకోని రాష్ట్ర మహిళా కమిషన్ ఛైర్‌పర్సన్‌ వాసిరెడ్డి పద్మ మీడియాలో హైలెట్ అయిన తర్వాత చర్యలు తీసుకోవాలంటూ పోలీస్ అధికారులకు ఆదేశించినట్లుగా చెప్పుకొచ్చారు. అయితే నేరం చేసిన వాళ్లను మహిళా కమిషన్ చైర్మన్ ఆదేశించే వరకూ చర్యలు తీసుకోరా అన్నది అందరిక వచ్చే డౌట్. నిజానికి వాలంటీర్లు చేస్తున్న నేరాలపై ప్రతి రోజూ ఏదో ఓ చోట కేసులు నమోదవుతూనే ఉన్నాయి. గతంలో నెల్లూరు జిల్లాలో ఓ వాలంటీర్ అభం శుభం ఎరుగని.. తొమ్మిదేళ్ల బాలికపై అత్యాచారానికి పాల్పడ్డాడు. పలు చోట్ల లైంగిక దాడులకు సంబంధించిన ఆరోపణలు వచ్చాయి.
వాలంటీర్లు తాము చట్టాలకు అతీతమని అనుకుంటున్నారో… అంతకు మించి ప్రభుత్వమే తాము అని ఫీలవుతున్నారో కానీ.. వారు చేస్తున్న నేరాలు దిగ్భ్రాంతి కలిగిస్తున్నాయి. పలు చోట్ల.. అత్యాచారాలు.. అత్యాచారయత్నాలు వెలుగులోకి వస్తున్నాయి. మద్యం అక్రమ రవాణా దగ్గర్నుంచి పోలీసులపై దాడులకు పాల్పడటం వరకూ ఘటనలపై రాష్ట్ర వ్యాప్తంగా కేసులు నమోదవుతున్నాయి. వాలంటీర్లు అసాంఘిక శక్తులుగా మారుతున్నారన్న ఆరోపణలు ప్రజల నుంచి వస్తున్నా పట్టించుకుంటున్న వారు లేరు. ప్రభుత్వం వారికి అవార్డులిచ్చి సన్మానాలు చేస్తోంది.
