తమిళనాడు రాజకీయాల్లో ప్రస్తుతం నెలకొన్న హంగ్ గందరగోళ పరిస్థితికి దారితీస్తోంది. అతిపెద్ద పార్టీగా అవతరించిన విజయ్ నేతృత్వంలోని టీవీకే కు మద్దతు ఇవ్వడానికి కాంగ్రెస్ ముందుకు రావడంతో, గవర్నర్ ఆయనను ప్రభుత్వ ఏర్పాటుకు ఆహ్వానించడం అనివార్యంగా కనిపిస్తోంది. అయితే, ఈ ప్రభుత్వం ఎంతకాలం నిలబడుతుందనేది ఇప్పుడు అసలైన ప్రశ్న.

గాలిలో దీపంలా మైనారిటీ సర్కార్

అసెంబ్లీలో మెజారిటీకి అవసరమైన 118 మార్కును టీవీకే సొంతంగా చేరుకోలేకపోయింది. కాంగ్రెస్ మద్దతు ఇచ్చినా సరిపోవు. ఇది ఒక అస్థిర ప్రభుత్వంగానే మిగిలిపోయే ప్రమాదం ఉంది. ఏ చిన్న అసంతృప్తి తలెత్తినా లేదా ఒక్క ఎమ్మెల్యే వెనక్కి తగ్గినా ప్రభుత్వం కుప్పకూలే పరిస్థితి ఉంటుంది. పాలనలో కఠిన నిర్ణయాలు తీసుకోవాలన్నా, సంక్షేమ పథకాలకు నిధులు కేటాయించాలన్నా నిరంతరం మిత్రపక్షాల దయాదాక్షిణ్యాలపై ఆధారపడాల్సి రావడం విజయ్‌కు పెద్ద ప్రతిబంధకంగా మారనుంది.

సుస్థిరతకు మార్గం – అన్నాడీఎంకేతో పొత్తు

విజయ్ ప్రభుత్వం ఐదేళ్ల పాటు నిలకడగా సాగాలంటే అన్నాడీఎంకే మద్దతు అత్యంత కీలకం. ఒకవేళ ఆ పార్టీ అధికారికంగా సంకీర్ణంలో చేరకపోతే, ఆ పార్టీలోని ఎమ్మెల్యేలను చీల్చడమే విజయ్ ముందున్న ఏకైక మార్గం. అన్నాడీఎంకేకు ఉన్న 47 మంది ఎమ్మెల్యేలలో మూడింట రెండొంతుల మందిని అంటే సుమారు 31 మందిని తనవైపు తిప్పుకోగలిగితే, పార్టీ ఫిరాయింపుల చట్టం నుండి తప్పించుకుని తన బలాన్ని సుస్థిరం చేసుకోవచ్చు. ఇప్పటికే అన్నాడీఎంకేలోని ఒక వర్గం విజయ్ వైపు మొగ్గు చూపుతున్నట్లు వార్తలు వస్తున్నా, పళనిస్వామి అందుకు ససేమిరా అంటున్నారు.

రాజకీయ దూకుడు – విజయ్ సిద్ధమేనా?

సినిమాల్లో విలన్లను ఎదిరించే హీరో పాత్రలు పోషించిన విజయ్, ఇప్పుడు నిజ జీవిత రాజకీయాల్లో అంతటి దూకుడును ప్రదర్శించగలరా అన్నది అనుమానమే. ఎమ్మెల్యేలను విలీనం చేసుకోవడం లేదా చీల్చడం వంటి ఆపరేషన్ ఆకర్ష్ వ్యూహాలు అమలు చేయాలంటే పక్కా రాజకీయ చాణక్యం కావాలి. కేవలం సెక్యులర్ ఇమేజ్ కోసం కాంగ్రెస్ తో జట్టుకట్టి, అన్నాడీఎంకేను దూరం చేసుకోవడం వల్ల విజయ్ రాజకీయంగా ఇరకాటంలో పడ్డారు. ఇప్పుడున్న పరిస్థితుల్లో పాత రాజకీయ తలపండిన నేతలను ఢీకొని నిలబడాలంటే విజయ్ తన వ్యూహాలను మార్చుకోక తప్పదు.

మూడేళ్ల గడువు.. జమిలీ ముప్పు

ఒకవేళ విజయ్ తన ప్రభుత్వాన్ని ఇలాగే అస్థిరంగా కొనసాగిస్తే, అది కేంద్రం ఆశిస్తున్న జమిలీ ఎన్నికలకు మార్గం సుగమం చేసినట్లు అవుతుంది. పాలనలో వైఫల్యాలు ఎదురైతే లేదా మద్దతు ఉపసంహరణ జరిగితే మధ్యంతర ఎన్నికలు అనివార్యం కావచ్చు. అందుకే, కేవలం ముఖ్యమంత్రి అనే ముద్ర కోసం కాకుండా, ఐదేళ్ల సుస్థిర పాలన కోసం విజయ్ ఇప్పుడు అన్నాడీఎంకే ఎమ్మెల్యేల మద్దతును ఎలా కూడగడతారో అన్నదే ఇప్పుడు తమిళనాడు రాజకీయాల్లో అసలైన క్లైమాక్స్. లేకపోతే మధ్యంతర ఎన్నికలు తప్పకపోవచ్చు.