కాంగ్రెస్ ప్రభుత్వం ఏర్పడి రెండేళ్లు అవుతోంది. పాలన విజయాలు ప్రచారం చేసుకోవాలని రేవంత్ నిర్ణయించారు . సభలు పెట్టాలనుకుంటున్నారు. పావలా పని చేసి రూపాయి ప్రచారం చేసుకోవడం రాజకీయ నేతలకు ఉండే మొదటి లక్షణం. కానీ తెలంగాణలో కాంగ్రెస్ పార్టీ రూపాయి పని చేసినా ప్రచారం చేసుకోలేకపోతోంది. పైగా ప్రతీ దానికి నిందలు మోయాల్సి వస్తోంది. ఆ పార్టీ రాష్ట్ర నాయకత్వంలో ఎవరికి వారుగా ఉన్న రాజకీయానికి తోడు.. వ్యూహాత్మక లేమితో ఇలాంటి సమస్యలు వస్తున్నాయి.
రైతులకు రెండు లక్షల రుణమాఫీ – కానీ చెప్పుకోగలిగారా?
రైతులకు రెండు లక్షల రుణమాఫీ అయిందనేది నిజం. దాదాపుగా పాతిక వేల కోట్లు రైతుల ఖాతాల్లో జమ చేశారు. ఏ పథకం అయినా అందరికీ వర్తించదు. కొంత మంది అనర్హులు ఉంటారు. సాంకేతిక సమస్యల వల్ల కొంత మందికి అంది ఉండదు. అలాంటివి పట్టుకుని బీఆర్ఎస్ రచ్చచేసింది కానీ.. తాము లక్షల మందికి రెండు లక్షలు ఇచ్చామని కాంగ్రెస్ ప్రచారం చేసుకోలేకపోయింది. ఇది ఒక్కటి కాదు ఉచిత బస్సు నుంచి కాంగ్రెస్ చేసిన పనులన్నింటినీ ప్రచారం చేసుకోవడంలో విఫలమయింది.
విపక్షాల ఆరోపణలకు సరైన కౌంటర్ లేని వైనం
కాంగ్రెస్ పాలనపై అవినీతి ముద్ర వేయడానికి విపక్షాలు ప్రయత్నిస్తున్నాయి. అవినీతి జరిగిందా లేదా అన్నది తర్వాత సంగతి కానీ ప్రతి విషయంలోనూ స్కాం ఆరోపణలు చేస్తున్నాయి. విపక్ష పార్టీలు చేయాల్సిన పని అదే. కానీ తాము నిజాయితీగా ఉన్నామని నిరూపించుకోవాల్సింది మాత్రం అధికార పార్టీనే. దానికి తగ్గ వ్యూహాన్ని పాటించాలి. కాంగ్రెస్ లో అలాంటి వ్యూహాలేమీ కనిపించడం లేదు. విపక్షాలు బురద చల్లేస్తున్నాయి. తుడుచుకోవడానికి కూడా కాంగ్రెస్ కు తీరిక ఉండటం లేదు. హిల్ట్ పాలసీ పేరుతో ప్రస్తుతం .. ప్రభుత్వంపై జరుగుతున్నదాడిని కూడా కూడా సమర్థంగా ఎదుర్కోలేకపోతున్నారు. ఐదు లక్షల కోట్ల స్కాం అంటే.. అసలేంటి విషయం అనేది ప్రజల ముందు పెట్టి బీఆర్ఎస్ ఆరోపణలకు కౌంటర్ ఇవ్వలేకపోతున్నారు.
చేసింది .. ప్రజలు చర్చించుకునేలా చేయడం కూడా ముఖ్యమే
చేసింది చెప్పుకోవడం అంటే.. సోషల్ మీడియాలో పోస్టర్లు వేసుకోవడం.. ఫుల్ పేజీ ప్రకటనలు ఇవ్వడం కాదు. ప్రజల్లో తమకు లభించిన ప్రయోజనాలపై చర్చలు జరగాలి. వ్యక్తిగతంగా కలిగిన ప్రయోజనంతో పాటు.. తమ ఊరికి, ప్రాంతానికి, తమ కుటుంబానికి ఎలాంటి మేలు జరిగిందో వారు గుర్తించేలా చేయగలగాలి. అలా చేయడం ద్వారానే తమ పాలానా విజయాల ప్రతిఫలం పొందగలుగుతారు. లేకపోతే.. ఎంత చేసినా.. ఏమీ చేయలేదని విపక్షాలు చేసే ప్రచారమే ప్రజలు నిజమనుకునే పరిస్థితి ఏర్పడితే అది రాజకీయంగా ఫెయిల్యూరే.
