తెలంగాణ రాజకీయాల్లో ముఖ్యమంత్రి రేవంత్ రెడ్డి ఎదురులేని నాయకుడిగా ఎదుగుతున్న సూచనలు కనిపిస్తున్నాయి. ఒకప్పుడు వైఎస్ ఉమ్మడి రాష్ట్ర కాంగ్రెస్ పై ఎలాంటి పట్టు సాధించారో ఇప్పుడు రేవంత్ కూడా అలాంటి పట్టు సాధిస్తున్నారు. ఢిల్లీ పర్యటనలో ఆయన చేసి నేనే రాజు.. నేనే మంత్రి అన్న వ్యాఖ్య కేవలం ఒక మాట మాత్రమే కాదు, తెలంగాణ కాంగ్రెస్‌పై ఆయన సాధించిన తిరుగులేని పట్టుకు అద్దం పడుతోంది. ఉమ్మడి ఆంధ్రప్రదేశ్‌లో వైఎస్ రాజశేఖర రెడ్డి కాంగ్రెస్ పార్టీని తన గుప్పిట్లోకి ఎలా తెచ్చుకున్నారో, నేడు రేవంత్ రెడ్డి కూడా అదే బాటలో పయనిస్తున్నారు.

హైకమాండ్ నమ్మకం – సొంత ముద్ర

కాంగ్రెస్ పార్టీలో సాధారణంగా ఒక ముఖ్యమంత్రికి హైకమాండ్ వద్ద పలుకుబడి సాధించడం అంత సులభం కాదు. కానీ రేవంత్ రెడ్డి అనతి కాలంలోనే గాంధీ కుటుంబం వద్ద అత్యంత విశ్వసనీయతను సంపాదించుకున్నారు. గతంలో వైఎస్ఆర్ ఎలాగైతే తన వ్యక్తిగత చరిష్మాతో ఢిల్లీని ఒప్పించి, రాష్ట్రంలో తన మాటకు ఎదురులేకుండా చేసుకున్నారో, నేడు రేవంత్ కూడా అదే వ్యూహాన్ని అమలు చేస్తున్నారు. అధిష్టానం ఆయనను కేవలం ఒక సీఎంగానే కాకుండా, పార్టీని నిలబెట్టే బలమైన శక్తిగా చూస్తోంది. అందుకే కేబినెట్ విస్తరణ వంటి కీలక అంశాల్లో కూడా రేవంత్ మాటే తుది నిర్ణయంగా మారుతోంది.

అంతర్గత అసమ్మతిని అణచివేసిన రేవంత్

రేవంత్ రెడ్డి ముఖ్యమంత్రి అయిన కొత్తలో సీనియర్ నేతల నుంచి కొంత వ్యతిరేకత ఎదురైంది. అయితే, తన వ్యూహాలతో వారిని తన దారిలోకి తెచ్చుకోవడంలో ఆయన విజయం సాధించారు. రాజగోపాల్ రెడ్డి వంటి నేతలు రేవంత్ నాయకత్వంపై అభ్యంతరాలు వ్యక్తం చేస్తున్నప్పటికీ ఆయనను ఇప్పుడు ఎవరూ పట్టించుకోవడం లేదు. ఆయన అన్న కోమటిరెడ్డి వెంకట్ రెడ్డి వంటి సీనియర్లు కూడా రేవంత్‌ను సమర్థించడం మొదలుపెట్టారు. ఇప్పుడు పార్టీలో రేవంత్ నిర్ణయాలకు ఎదురుచెప్పే సాహసం ఎవరూ చేయడం లేదు. విమర్శించిన వారే ఇప్పుడు ఆయన నాయకత్వాన్ని బలపరుస్తుండటం రేవంత్ సాధించిన అతిపెద్ద రాజకీయ విజయం.

వైఎస్ఆర్ శైలిలో పట్టు

ఉమ్మడి రాష్ట్రంలో వైఎస్ రాజశేఖర రెడ్డి ఎలాగైతే పార్టీని తన కంట్రోల్‌లోకి తెచ్చుకున్నారో, రేవంత్ రెడ్డి కూడా పీసీసీ ప్రెసిడెంట్ స్థాయి నుంచి నేరుగా ప్రజలతో మమేకమై అధికారాన్ని చేపట్టారు. అధికారంలోకి వచ్చిన తర్వాత పాలనాపరమైన నిర్ణయాల్లో తనదే అంతిమ నిర్ణయం అని చాటిచెప్పడం ద్వారా పార్టీ శ్రేణులకు స్పష్టమైన సందేశాన్ని పంపారు. విపక్షాల విమర్శలను తనదైన శైలిలో తిప్పికొడుతూ, పాలనపై పట్టు బిగించడం రేవంత్ ప్రత్యేకత. ఇది ఒకప్పుడు వైఎస్ఆర్ హయాంలో కనిపించిన రాజకీయ స్థిరత్వాన్ని గుర్తుచేస్తోంది. రేవంత్ రెడ్డి తెలంగాణ కాంగ్రెస్‌లో ఒక కొత్త సంస్కృతిని తీసుకువచ్చారు. గ్రూపు రాజకీయాలకు స్వస్తి పలికి, పార్టీ మొత్తాన్ని తన నాయకత్వం కింద ఏకం చేయడంలో ఆయన సఫలీకృతమయ్యారని అనుకోవచ్చు.