చిరంజీవి, నాగార్జున, బాల‌కృష్ణ, వెంక‌టేష్‌…. అగ్ర తార‌లుగా త‌న ఆధిప‌త్యం చ‌లాయించారు. ఇప్ప‌టికీ వాళ్ల ప్ర‌భావం ఉంది. అయితే ఎవ‌రూ ఎప్పుడూ మ‌రో అగ్ర హీరోతో మల్టీస్టారర్ చేయ‌లేదు. చేసే అవ‌కాశాలు వ‌చ్చినా – అప్ప‌ట్లో కొన్ని స‌మీక‌ర‌ణాల వ‌ల్ల కుద‌ర్లేదు. వెంకీ – నాగ్ లు క‌లిసి `ఘ‌ర్ష‌ణ` సినిమా చేయాలి. మ‌ణిర‌త్నం వీరిద్ద‌రికీ క‌థ వినిపించాడు. కానీ కొన్ని కార‌ణాల వ‌ల్ల ఇద్ద‌రూ `నో` చెప్పాల్సివ‌చ్చింది. చిరంజీవి, నాగార్జున క‌లిసి ఓ సినిమా చేద్దామ‌ని ఎప్ప‌టి నుంచో అనుకుంటున్నారు. కానీ క‌థే సెట్ అవ్వ‌డం లేదు.
ఆ త‌రంతో సాధ్యం కాని ఫీట్లు.. ఈ త‌రం చేసి చూపిస్తోంది. ముఖ్యంగా మల్టీస్టారర్ విష‌యాల్లో. ఇద్ద‌రు హీరోలు క‌లిసి ప‌నిచేయ‌డం వ‌ల్ల.. ఎన్ని సౌల‌భ్యాలు ఉన్నాయో ఇప్పుడిప్పుడే అంద‌రికీ అర్థం అవుతోంది. అందులో భాగంగానే ఇప్పుడు మెగా – అక్కినేని మ‌ల్టీస్టార‌ర్‌కి రంగం సిద్ధం అవుతోంద‌ని స‌మాచారం. సాయిధ‌ర‌మ్ తేజ్ ద‌గ్గ‌ర‌కు ఓ క‌థ వ‌చ్చింది. ఇందులో మ‌రో హీరోకి కూడా స్కోప్ ఉంది. నిజానికి ఇద్ద‌రు మెగా హీరోల‌తో ఈ సినిమా చేయాల‌న్న‌ది ద‌ర్శ‌కుడి ఉద్దేశం. కానీ… సాయిధ‌ర‌మ్ తేజ్ మాత్రం అఖిల్, నాగ‌చైత‌న్య‌ల‌లో ఒక‌రైతే బాగుంటుంద‌ని సూచించాడ‌ట. ఇప్పుడు క‌థ.. వాళ్ల ద‌గ్గ‌ర‌కు వెళ్లింది. అఖిల్, చైతూ… వీళ్ల‌లో ఎవ‌రు ఓకే అన్నా.. ఈ ప్రాజెక్టు ప‌ట్టాలెక్కుతుంది. త్వ‌ర‌లోనే పూర్తి వివ‌రాలు బ‌య‌ట‌కు వ‌స్తాయి.
