పాపం… సాయిధరమ్ తేజ్. ‘సుప్రీమ్’ తరవాత అతడి ఖాతాలో సరైన హిట్ పడలేదు. ‘తిక్క’ ఫ్లాప్‌తో మొదలు పెడితే… ‘ఇంటిలిజెంట్’ వరకూ ప్రతి సినిమాకి తలబొప్పి కట్టే తీర్పు ఇచ్చారు ప్రేక్షకులు. దాంతో యువ హీరోల రేసులో తేజ్ వెనకబడ్డాడు. దానికి తోడు రొటీన్ సినిమాలు చేస్తున్నాడని విమర్శలు ఎదుర్కొంటున్నారు. మెగా అభిమానులు కూడా అతడికి రొటీన్ సినిమాలు చేయవద్దని సలహా ఇచ్చార్ట. జూలై 6న ‘తేజ్.. ఐ లవ్ యు’ సినిమాతో ప్రేక్షకుల ముందుకు వస్తున్నాడు ఈ హీరో. ఈ సందర్భంగా సాయిధరమ్ తేజ్ మాట్లాడుతూ “రొటీన్ కథల జోలికి వెళ్లకుండా కొత్త తరహా కథల్ని ఎంపిక చేసుకోమని అభిమానులు చెబుతుంటారు. నాకూ కొత్త కథలు, కొత్త తరహా సినిమాలు చేయాలని వుంటుంది. కొన్నిసార్లు డేట్స్ అడ్జస్ట్ కాక, షెడ్యూల్స్‌ కుదరని కారణంగా వదులుకోవాల్సి వస్తుంది” అని పేర్కొన్నారు. అలాగే, అభిమానులు ఈ హీరోకి బరువు తగ్గమని కూడా సలహా ఇచ్చారని చెప్పుకొచ్చారు. అవన్నీ విన్న సాయిధరమ్ తేజ్ తగ్గడానికి ప్రయత్నిస్తున్నానని చెబుతున్నారు. ‘తేజ్.. ఐ లవ్ యు’ ప్రచార చిత్రాల్లో బొద్దుగా కనిపించిన ఈ హీరో, తరవాత సినిమాలో కాస్త సన్నబడతాడేమో చూడాలి.
నాకూ కొత్త కథలు చేయాలనుంది: తేజ్
