అర్జున్ రెడ్డి తీసిన సందీప్ రెడ్డి వెనుక ఇప్పుడంటే నిర్మాత‌లు ఎగ‌బ‌డుతున్నారు గానీ, ఒక‌ప్పుడు ఆయ‌న క‌థ‌లు ప‌ట్టుకొని నిర్మాత‌ల వెంట తిరిగిన‌వాడే. అర్జున్ రెడ్డి క‌థ‌ని చాలామందికి చెప్పి ‘నో’ అనిపించుకొన్నాడు. నిర్మాత‌లెవ‌రూ ఈ క‌థ‌ని న‌మ్మ‌క‌పోవ‌డం వ‌ల్ల తానే నిర్మాత‌గా మారాల్సివ‌చ్చింది. అయితే అర్జున్ రెడ్డి క‌థ కంటే ముందే.. ‘షుగ‌ర్ ఫ్యాక్ట‌రీ’ అనే ఓ క్రైమ్ థ్రిల్ల‌ర్ ని త‌యారు చేసుకొన్నాడ‌ట సందీప్ రెడ్డి. ఆ క‌థ ప‌ట్టుకొని దాదాపు యేడాది తిరిగాడ‌ట. కానీ.. ఒక్క నిర్మాతా ధైర్యం చేయ‌లేదు. ‘నీ ఇంటిలిజెన్సీ మ‌రీ ఎక్కువైపోయింది.. అది త‌గ్గించుకో. అంద‌రికీ అర్థ‌మ‌య్యే క‌థ ఎంచుకో’ అని స‌ల‌హా ఇచ్చార‌ట. క్రైమ్ స్టోరీల కంటే ల‌వ్ స్టోరీనే బెట‌ర్ అనుకొని, ఆ క‌థ ప‌క్క‌న పెట్టేసి అప్పుడు అర్జున్ రెడ్డి స్క్రిప్టు త‌యారు చేసుకొన్నాడు. దాన్నిఏ నిర్మాతా న‌మ్మ‌లేద‌నుకోండి… అది వేరే విష‌యం. కాక‌పోతే.. ఇప్పుడు షుగ‌ర్ ఫ్యాక్ట‌రీ తీయ‌డానికి నిర్మాత‌లు పోటీ ప‌డి మ‌రీ ముందుకొస్తారు. స‌క్సెస్ ఉన్న‌వాడికే విలువ ఎక్కువ కదా? కాక‌పోతే.. షుగ‌ర్ ఫ్యాక్ట‌రీ అనే సినిమాని ఎప్ప‌టికైనా తానే నిర్మిస్తాన‌ని, అది త‌న‌కు అత్యంత ఇష్ట‌మైన స‌బ్జెక్ట్ అని చెబుతున్నాడు సందీప్ రెడ్డి.
అర్జున్ రెడ్డి ద‌ర్శ‌కుడి ‘షుగ‌ర్ ఫ్యాక్ట‌రీ’
