ఏపీ బీజేపీ నేతలకు ఏం చెప్పుకోవాలో తెలియడం లేదో.. ఏం చెప్పినా నమ్మరని అనుకుంటున్నారేమో కానీ.. కాకి లెక్కలు చెప్పేస్తున్నారు. విజయవాడలో పదాదికారుల సమావేశం నిర్వహించి… ప్రసంగించిన ఏపీ బీజేపీ అధ్యక్షుడు సోము వీర్రాజు ఏపీలో మూడు లక్షల కోట్లతో రోడ్లు కేంద్రం వేస్తోందని చెబుతున్నారు. అలాగే పోలవరంకు నాలుగేళ్లలో రూ. పదిహేను వేల కోట్లు ఇచ్చిందని కూడా చెబుతున్నారు. అయితే ఇన్ని ఎప్పుడిచ్చారో.. ఏ రికార్డుల్లో ఉందో మాత్రం వారికే తెలియలా. అయితే సోము వీర్రాజు చెప్పినట్లుగా.. లక్షల కోట్ల అప్పులు మాత్రం ఏపీ ప్రభుత్వం లెక్కల్లేకుండా తీసుకోవడంలో సహకరించిందన్న సెటైర్లు పడుతున్నాయి.
పదాదికారుల సమావేశంలో గతంలోలా టీడీపీని విమర్శించలేదు. కానీ వైసీపీ ని మాత్రం టార్గెట్ చేశారు. పండుగల విషయంలో ఇతర పండుగలకు లేని ఆంక్షలు హిందువులు పండుగలకు పెడుతున్నారని.. క్రిస్మస్ వస్తుంటే ఎందుకు ఇటువంటి నిబంధనలు ఉండవనిబీజేపీ నేతలు ప్రశ్నించారు. పోలీసు స్టేషన్ లో కూడా క్రిస్మస్ పండుగలు చేయించారని మండిపడ్డారు. మైనారిటీ లు, క్రైస్తవులు ను భుజాన ఎక్కించుని హిందువులు ను ఆంక్షల పేరుతో అడ్డంకులు పెడతారా అని తమదైన రాజకీయాలు చేసారు.
మోడీ మళ్లీ 400సీట్లతో గెలుస్తారనే నమ్మకం ప్రజలకు ఉందని.. రాష్ట్ర వ్యాప్తంగా ఐదు వేల ప్రాంతాలలో సభలు నిర్వహించి పార్టీని బలోపేతం చేస్తామని ప్రకటించారు. మోడీ ప్రజా పాలన, జగన్ ప్రజా కంఠక పాలన ను వివరిస్తామని తెలిపారు. జగన్ ప్రభుత్వానికి ప్రత్యామ్నాయంగా బిజెపి బలపడుతుందని.. వీధి వీధిన బిజెపి పేరుతో ప్రజల్లోకి వెళతామని చెబుతున్నారు. బిజెపి తో పొత్తులు ముడి పెడుతూ ఎవరో ఏదో రాస్తే మేము పట్టించుకోమని.. ప్రకటించారు. మేధావులు తో సమావేశాలు ఏర్పాటు చేసి మోడి ఎపికి చేసిన సాయం గురించి వివరిస్తామన్నారు.
ఫిబ్రవరిలో జరగనున్న మూడు గ్రాడ్యుయేట్ ఎమ్మెల్సీ, రెండు టీచర్ల ఎమ్మెల్సీ ఎన్నికకు బిజెపి సిద్దమవుతుందని చెబుతున్నారు. గతంలో టీడీపీ మద్దతుతో విశాఖ నుంచి పోటీ చేసిన మాధవ్ గెలిచారు. ఇప్పుడు టీడీపీ మద్దతు లేకపోతే బీజేపీకి కనీస ఓట్లు వస్తాయో లేదో కూడా డౌటే. అయినా పోటీ చేస్తామని జీవీఎల్ చెబుతున్నారు. టీడీపీతో పొత్తు విషయంలో ఆయన ఎలాంటి ఖండనలు చేయలేదు. కానీ సొంతంగా బలపడతామని మాత్రం చెబుతున్నారు.
