దేశవ్యాప్తంగా అన్ని రాష్ట్రాల నుంచి వచ్చిన రైతు సంఘాల నేతలు కేసీఆర్‌ను జాతీయ రాజకీయాల్లోకి రావాలని బలవంత పెట్టారు. దానికి కేసీఆర్ అంగీకరించారు. ఈ విషయాన్ని పెద్దపల్లి జిల్లాలో జరిగిన కలెక్టరేట్ ప్రారంభోత్సవ సభ అనంతరం కేసీఆర్ ప్రకటించారు. కేంద్రం దిక్కుమాలిన ప్రభుత్వం పోయి.. రైతు ప్రభుత్వం రాబోతోందని జోస్యం చెప్పారు. ఇతర పార్టీలతో ఏమో కానీ రైతు నేతలందరితో కలిసి ఆయన సొంత రైతు పార్టీ పెట్టనున్నట్లుగా కేసీఆర్ మాటలతో అర్థమవుతోందని రాజకీయవర్గాలు అంచనా వేస్తున్నాయి.
ఇప్పటి వరకూ కేసీఆర్ జాతీయ రాజకీయ పార్టీ విషయంలో .. ముందకూ వెనుక్కూ జరుగుతున్నారు. ఉంటుందా ఉండదా అనే పరిస్థితికి వచ్చింది. అయితే ఇప్పుడు బీజేపీ దూకుడు మరింత ఎక్కువ కావడంతో ఆయన జాతీయ రాజకీయాల్లోకి వెళ్లాలని నిర్ణయించారు. రైతులందర్నీ ఏక తాటిపైకి తెస్తే ప్రభావం ఉంటుందని కేసీఆర్ భావిస్తున్నారు. ఇప్పటికే రైతుల్లో కేంద్రంపై వ్యతిరకేత ఉందని భావిస్తున్నందున ఈ విషయంపై కేసీఆర్ గట్టి ప్రణాళికతో ఉన్నారని చెబుతున్నారు.
ఉచిత విద్యుత్, మీటర్లు లేని విద్యుత్ హామీని కేసీఆర్ ప్రధానంగా ఇవ్వనున్నట్లుగా పెద్దపల్లిలో కేసీఆర్ ప్రసంగం ద్వారా అర్థం చేసుకోవచ్చు. దేశం మొత్తం రైతులకు ఉచితంగా విద్యుత్ ఇస్తే రూ. లక్షన్నర కోట్లు కూడా కాదని.. కానీ పది లక్షల కోట్లకుపైగా పెద్దలకు దోచి పెట్టారన్నారు. కేసీఆర్ జాతీయ రాజకీయాల్లోకి వెళ్లాలని పూర్తిగా డిసైడయినట్లుగా ప్రసంగం సాగింది. జాతీయ రాజకీయాల్లోకి వెళ్లనా అని అడిగి ప్రజల ఆమోదం తీసుకున్నారు. జిల్లాల పర్యటన అయిపోయినతర్వాత కేసీఆర్ ఇక ఢిల్లీ రైతు పార్టీని ప్రారంభించే అవకాశం ఉంది.
