తెలుగు సినిమాకి ఫ్యాక్ష‌న్‌ని ప‌రిచ‌యం చేసిన ద‌ర్శ‌కుల్లో బి.గోపాల్ ఒక‌రు. క‌మ‌ర్షియ‌ల్ సినిమాల నాడీ తెలిసిన వ్య‌క్తి. అగ్ర హీరోలంద‌రితోనూ ప‌నిచేశాడు. బాల‌య్య తో అయితే సూప‌ర్ హిట్ కాంబినేష‌న్‌. అయితే కొంత‌కాలంగా ఆయన తెర వెన‌కే ఉన్నారు. గోపీచంద్‌తో తెర‌కెక్కించిన `ఆర‌డుగుల బుల్లెట్‌` ఆయ‌న‌చివ‌రి చిత్రం. ఆ సినిమా కూడా రిలీజ్ కాకుండా పోయింది.
ఇప్పుడు ఆయన సినిమా వేడుక‌ల్లో కేవ‌లం `అతిథి` పాత్ర‌ల్లోనే ద‌ర్శ‌న మిస్తున్నారు. అయితే… ఇప్పుడు మళ్లీ ద‌ర్శ‌క‌త్వం వ‌హించాల‌న్న కోరిక పుట్టింది. అందుకే ఓ క‌థ సిద్ధం చేసుకునే ప్ర‌య‌త్నాల్లో ఉన్నారు. ఈసారి కూడా ఓ పెద్ద హీరోతోనే సినిమా చేయాల‌ని భావిస్తున్నార్ట. బి.గోపాల్ కి సుదీర్ఢ‌మైన కెరీర్ ఉంది. ప‌రిశ్ర‌మ‌లో ఆయ‌నంటే అంద‌రికీ గౌర‌వమే. కానీ.. ఆయన చివ‌రి సినిమా ఆగిపోయింది. చివ‌రి సినిమా కూడా మైలురాయిలానే ఉండాల‌ని బి.గోపాల్ భావిస్తున్నారు. అందుకే.. ఓ మంచి హిట్‌తో కెరీర్ ముగించాల‌ని అనుకుంటున్నారు. అందుకే వెట‌ర‌న్ అయినా కూడా.. మళ్లీ మెగాఫోన్‌పై దృష్టి సారించారు.
