ఎవరైనా విందులు ఎందుకిస్తారు..? అదీ కూడా వంద రకాల వంటకాలు.. వెయ్యి రూపాయిల కిళ్లీ.. అంటూ.. విశేషాలు ఎందుకు ప్రచారం చేస్తారు..? ఇంట్లో శుభకార్యం అయితే.. దర్పం చూపించుకోవాలనుకునేవారు అయితే.. ఇలా చేస్తారు. కానీ..ఎలాంటి సందర్భం లేకుండా కాస్ట్‌లీ విందు ఏర్పాటు చేసేవారే.. వైసీపీ ఎంపీ రఘురామకృష్ణం రాజు. బుధవారం రోజు.. ఆయన ఢిల్లీలో తన వియ్యంకుడైన కాంగ్రెస్ ఎంపీ .. కేవీపీ రామచంద్రరావు ఇంట్లో భారీగా విందు ఇస్తున్నారు. ఆ విందు విశేషాలు.. వారం రోజుల నుంచి.. మీడియాకు.. కొద్దికొద్దిగా చెబుతున్నారు. వంద రకాల వంటకాలు.. అన్ని ప్రదేశాల స్పెషల్స్.. అలాగే.. వెయ్యి రూపాయల విలువైన కిళ్లీ.. ప్రత్యేకమని.. చెప్పుకొస్తున్నారు. ఇప్పుడు సమయం దగ్గర పడింది కాబట్టి.. రాజకీయం కూడా.. ప్రత్యేకంగా మారిపోయింది.
రఘురామకృష్ణంరాజు.. ఈ విందును.. గెట్ టు గెదర్‌లా ఏర్పాటు చేయలేదు. దాదాపు మూడు వేల మందిని పిలిచి మరీ భారీగా చేస్తున్నారు. అతిధుల జాబితాలో ప్రధాని నరేంద్రమోడీ, బీజేపీ అధ్యక్షుడు అమిత్ షాతో పాటు.. కేంద్రమంత్రివర్గం అంతా ఉంది. ఇతర పార్టీల నేతలతో పాటు సినీ, రాజకీయ ప్రముఖులు అతిధుల జాబితాలో ఉన్నారు. రఘురామకృష్ణంరాజు విందుపై.. వైసీపీనేతలు మాత్రమే గుంభనంగా ఉన్నారు. ఎందుకంటే.. ఆయన పూర్తిగా.. వ్యక్తిగత హోదాలో విందు ఏర్పాటు చేస్తున్నారు. జగన్మోహన్ రెడ్డి అసలు.. తమ పర్మిషన్ లేకుండా… ఎవర్నీ కలవడానికే అవకాశం లేదంటే.. ఆయన ఏకంగా.. అందర్నీ పిలిచి విందులు ఇస్తున్నారు.
రఘురామకృష్ణంరాజు బీజేపీ ఫోల్డ్‌లోకి వెళ్లిపోయారన్న ఉద్దేశంతోనే… జగన్.. నర్సాపురం పార్లమెంట్ నియోజకవర్గానికి చెందిన ముఖ్య బీజేపీ నేత గోకరాజు గంగరాజు కుటుంబసభ్యులను హడావుడిలో పార్టీలో చేర్చుకుని ప్రత్యామ్నాయం చూసుకున్నారన్న చర్చ జరుగుతోంది. ఇలాంటి సమయంలో… రఘురామకృష్ణంరాజు విందు ఇస్తున్నారు. రఘురామకృష్ణంరాజు మొదటి సారి ఎంపీ అయ్యారు. కానీ తనదైన శైలిలో భిన్నమైన రాజకీయం చేస్తున్నారు. దానికి ఆయన వియ్యంకుడు కేవీపీ కూడా అండగా ఉంటున్నారని.. తాజా పరిణామాలతో తేలుతోంది. ఈ రఘురామ విందు రాజకీయం ఏ మలుపులు తిరుగుతుందో చూడాలి..!
