కొన్ని తేదీల్ని టాలీవుడ్ అస్స‌లు వ‌ద‌ల‌దు. పోటీ ఎక్కువైనా స‌రే – త‌మ సినిమాల్ని రంగంలోకి దింపాల‌ని నిర్మాత‌లు ఎదురుచూస్తుంటారు. ఇప్పుడు టాలీవుడ్ దృష్టి ఆగ‌స్టు 11పై ప‌డింది. వ‌రుస‌గా నాలుగు రోజులు సెల‌వ‌లు వ‌స్తుండ‌డంతో… ఆగ‌స్టు 11ని టార్గెట్ చేశారు నిర్మాత‌లు. ఆ రోజున ఒకేసారి మూడు సినిమాలు రాబోతున్నాయి. జ‌య జాన‌కి నాయ‌క, లై, నేనే రాజు – నేనే మంత్రి సినిమాల రిలీజ్ డేట్ ఆ రోజే ఫిక్స్ చేశారు. ఈ మూడు సినిమాల‌పైనా భారీ అంచ‌నాలున్నాయి.
బోయ‌పాటి శ్రీ‌ను సినిమా కావ‌డంతో.. మాస్‌ని జ‌య జాన‌కి నాయ‌క ఆక‌ర్షిస్తోంది. బాహుబ‌లి త‌ర‌వాత రానా నుంచి వ‌స్తున్న సినిమా కావ‌డం, ప్ర‌చార చిత్రాలు బాగుండ‌డంతో నేనే రాజు – నేనే మంత్రిపై ఫోక‌స్ పెరిగింది. ఇక నితిన్ కూడా వ‌రుస విజ‌యాల‌తో దూసుకుపోతున్నాడు. స‌రికొత్త గెట‌ప్ లో క‌నిపిస్తున్న ‘లై’…లో హిట్టు `బొమ్మ` ముందే క‌నిపించిపోతోంది. ట్రైలర్ కూడా స‌రికొత్త‌గా క‌ట్ చేయ‌డం, అర్జున్ ఈ సినిమాకి ప్ర‌తినాయ‌కుడు కావ‌డంతో.. ‘లై’పై అంచ‌నాలు పెరిగాయి. ఈ మూడు సినిమాలూ ఇప్పుడు 11నే రాబోతున్నాయి. సాధార‌ణంగా బాక్సాఫీసు ద‌గ్గ‌ర ఒక‌ట్రెండు సినిమాల‌కే చోటుంది. కాక‌పోతే.. సెల‌వ‌లు వ‌స్తున్నాయి కాబ‌ట్టి, ఈ గ్యాప్‌ని క్యాష్ చేసుకోవాల‌న్న ఉద్దేశంతో మూడు సినిమాలూ స‌మ‌ర‌శంఖం పూరించాయి. వీటిలో గెలుపు ఎవ‌రిదైనా…. సినీ అభిమానుల‌కు మాత్రం అస‌లైన మజా అంద‌డం ఖాయం.
