హైదరాబాద్: దేశాన్ని కుదిపేసిన బీఫ్ అంశం ఇప్పుడు హైదరాబాద్‌లోని ఉస్మానియా యూనివర్సిటీకి చేరింది. ఈనెల 10న ఉస్మానియా యూనివర్సిటీ ఆవరణలోని ఆర్ట్స్ కాలేజ్ వద్ద బీఫ్ ఫెస్టివల్ నిర్వహిస్తామని దళిత, బహుజన, మైనార్టీ, వామపక్షాలకు చెందిన 26 విద్యార్థి సంఘాలు ప్రకటించగా, దానిని అడ్డుకుంటామని బీజేపీ, జనజాగృతి సంస్థ తదితర సంఘ్ పరివార్ సంస్థలు హెచ్చరించాయి. దీనితో ఉస్మానియా యూనివర్సిటీ అట్టుడుకుతోంది.
విద్యార్థులలో బీఫ్ వివాదంపై అవగాహన పెంచేందుకే తాము ఫెస్టివల్ నిర్వహిస్తున్నామని విద్యార్థిసంఘాల నాయకులు చెబుతున్నారు. ప్రజల ఆహారపు అలవాట్లపై హిందూ మతోన్మాద శక్తుల పెత్తనానికి నిరసనగా దీనిని నిర్వహిస్తున్నట్లు తెలిపారు. ఈనెల 5న అన్ని పార్టీలతో రౌండ్ టేబుల్ నిర్వహిస్తామని, 7వ తేదీన నెక్లెస్ రోడ్‌లో 5కే రన్ కూడా నిర్వహిస్తామని వెల్లడించారు. ప్రజల ఆహారపు అలవాట్లపై ఆంక్షలు విధించే హక్కు ఎవరికీ లేదని అంటున్నారు. ఎన్ని అడ్డంకులు ఎదురైనా, ఎవరు వ్యతిరేకించినా బీఫ్ ఫెస్టివల్ నిర్వహించి తీరుతామని, బీజేపీ మినహా అన్ని పార్టీలూ తమకు మద్దతు ఇచ్చాయని చెబుతున్నారు. ఎవరైనా దాడులు చేస్తే ప్రతి దాడులు తప్పవని అంటూనే ప్రభుత్వమే తమకు రక్షణ కల్పించాలని కూడా కోరారు.
మరోవైపు ఉస్మానియాలో తలపెట్టిన బీఫ్ ఫెస్టివల్‌ను అడ్డుకునేందుకు హిందూత్వ వాదులంతా సిద్ధంగా ఉండాలని, ఆ కార్యక్రమాన్ని అడ్డుకునేందుకు డిసెంబర్ 10న నిర్వహించే చలో ఉస్మానియా కార్యక్రమాన్ని తాము నిర్వహిస్తున్నామంటూ బీజేపీ నేత, గోషా మహల్ ఎమ్మెల్యే రాజాసింగ్ ప్రకటించారు. బీఫ్ ఫెస్టివల్‌ను ఆపాలని యూనివర్సిటీ అధికారులకు, సచివాలయంలోని ప్రభుత్వాధికారులకు వినతిపత్రాలు సమర్పించారు. బీఫ్ ఫెస్టివల్ నిర్వహించటమంటే హిందువుల మనోభావాలను దెబ్బతీయటమేనని అన్నారు. ఆ కార్యక్రమాన్ని అడ్డుకుని తీరుతామని చెప్పారు.
ఇరువర్గాలూ తమ తమ వాదనపై పట్టుపట్టుకుని కూర్చుని ఉండటంతో 10వ తేదీన ఏం జరుగుతుందోనని ఉస్మానియా విద్యార్థులు ఆందోళన చెందుతున్నారు. ఈ వివాదం ఎలాంటి పరిణామాలకు దారితీస్తుందోనని పోలీసులు ముందు జాగ్రత్తగా క్యాంపస్‌లో, పరిసరాల్లో బందోబస్తును పటిష్ఠం చేశారు.
