టాలీవుడ్ హీరోయిన్ల జాబితా ఎక్కువవుతున్న ఈ సందర్భంలో స్టార్ హీరోయిన్స్ కూడా తగినంత ముట్టచెబితే ఐటం సాంగ్ కూడా సిద్ధమవుతున్నారు. అయితే హీరోయిన్ గా తెరంగేట్రం చేసి అలా అవకాశాలు రావట్లేదని ఐటం సాంగులనే నమ్ముకుని ఉంది హంసా నందిని. అమ్మడు చేసిన ఐటం సాంగులు కూడా బాగా హిట్ అవుతుండటంతో స్టార్ హీరోల నుండి చిన్న హీరోల దాకా హంసా నందిని ఐటం బాంబ్ అయ్యింది.
మిర్చీ.. మిర్చీ..మిర్చీ లాంటి కుర్రాడే అంటూ మిర్చీ సినిమాలో ప్రభాస్ తో కలిసి మాస్ బీట్ ని చితక్కొట్టిన హంసా లౌఖ్యం సినిమాలో సుర్.. సూపరు.. సుర్.. సూపరు.. అంటూ గోపీచంద్ తో కూడా స్టెప్పులేసి సూపర్ అనిపించుకుంది. మొన్నీమధ్యే విడుదలైన రవితేజ ‘బెంగాల్ టైగర్’ సినిమాలో కూడా ఓ సాంగ్ చేసిన అమ్మడు ఇప్పుడు మరో క్రేజీ మూవీలో ప్రత్యేక గీతంలో నర్తించనుంది. అల్లు వారి అబ్బాయి అల్లు శిరీష్ నటిస్తున్న సినిమాలో హంసా ఓ ప్రత్యేక గీతంలో నర్తించడమే కాదు మంచి ప్రాముఖ్యం ఉన్న పాత్రలో కూడా మెరుస్తుందట.
యువత, సోలో సినిమాలతో మంచి దర్శకుడిగా గుర్తింపు తెచ్చుకున్న పరశురాం దర్శకత్వం వహిస్తున్న ఈ సినిమాలో అల్లు శిరీష్ కి జతగా లావణ్య త్రిపాఠి నటిస్తుంది. హంసా అందాలను ఎరగా వేస్తున్న ఈ సినిమా అయినా శిరీష్ కెరియర్ లో మంచి విజయం సాధించి అల్లు వారి పరువును కాపాడుతుందేమో చూద్దాం.
