హైదరాబాద్: తెలుగుదేశం ప్రభుత్వ తీరుపై వైఎస్ఆర్ కాంగ్రెస్ అధినేత జగన్మోహన్ రెడ్డి ఇవాళ మంచి పాయింట్‌లు లేవనెత్తారు. ఆంధ్రప్రదేశ్‌ను కుదిపేసిన కాల్‌మనీ వ్యవహారానికి సంబంధించిన కేసులను సాధారణ వడ్డీ కేసులలాగా చిత్రీకరించి ఆ కేసులను నీరుగారుస్తున్నారని జగన్ ఆరోపించారు. విజయవాడలో ఎమ్మెల్యే, ఎమ్మెల్సీ ప్రమేయమున్న కాల్‌మనీ కేసులలో బలహీనమైన సెక్షన్లు పెట్టారని, ఈ కేసుల్లో బెయిల్‌కు కోర్టుకు కూడా వెళ్ళనవసరంలేదని, ఎమ్మెల్సీ సోదరుడికి అలాగే పోలీస్ స్టేషన్‌లోనే బెయిల్ ఇచ్చేశారని జగన్ చెప్పారు. ప్రధాన నిందితుల్లో ఒకరైన శ్రీకాంత్‌తో టీడీపీ ఎమ్మెల్యే బోడె ప్రసాద్ విదేశాలకు వెళ్ళి వస్తే, ఆ నిందితుడి ఆచూకీ గురించి పోలీసులు ఎమ్మెల్యేను కనీసం ప్రశ్నించను కూడా ప్రశ్నించలేదని ఆరోపించారు. కాల్‌మనీ వ్యవహారం జరిగితే రాష్ట్రమంతటా దాడులు నిర్వహించటమేమిటని ప్రశ్నించారు. మిగిలిన పార్టీలకు చెందిన వడ్డీ వ్యాపారులపై దాడులు చేశారని అన్నారు. ఈ ఆరోపణలన్నింటిలో వాస్తవం లేకపోలేదు. కాల్‌మనీ కేసు జరిగింది ప్రధానంగా విజయవాడలో. ఆరోపణలు వచ్చింది తెలుగుదేశం పార్టీకి సంబంధించిన వారిపై. అయినా కూడా అది రాష్ట్రవ్యాప్తంగా జరిగిన వ్యవహారంలాగా చిత్రీకరించి రాష్ట్రవ్యాప్తంగా అన్ని పార్టీలకు చెందిన సాధారణ వడ్డీ వ్యాపారులపై దాడులు చేశారు. ఈ వ్యవహారంలో అన్ని పార్టీలవారూ ఉన్నారన్న కలర్ తీసుకొచ్చారు. రాష్ట్రంలో పారిశ్రామిక వేత్తలకు భూముల కేటాయింపులు, రాజధాని అమరావతిలో సింగపూర్ కంపెనీలకు భూముల కేటాయింపుల గురించి కూడా జగన్ గణాంకాలతో సహా ప్రభుత్వంలో అక్రమాలను వివరించారు.
టీడీపీ ప్రభుత్వ తీరుపై మంచి పాయింట్‌లు లేవనెత్తిన జగన్
