నాగార్జున – అనుష్కల‌ది ‘సూపర్’ బంధం. అన్నపూర్ణ కాంపౌండ్ నుంచి అడుగుపెట్టిన క‌థానాయిక అనుష్క. నాగ్ అంటే స్వీటీకీ, స్వీటీ అంటే నాగ్‌కీ ఓ ప్రత్యేక‌మైన అనుబంధం. సూపర్, డాన్‌, ఢ‌మ‌రుకం, ర‌గ‌డ సినిమాల్లో వెండి తెర‌పై సందడి చేసిందీ జంట. నాగ్ అడిగితే గెస్ట్ రోల్ కూడా సై అంటుంది అనుష్క. సోగ్గాడే, ఊపిరి, నమో వేంకటేశాయ సినిమాల్లో స్వీటీ అతిధి పాత్రలు.. నాగ్ పై వున్న అభిమానంతో చేసినవే.
ఇప్పుడు మరోసారి వెండితెరపై సందడి చేయబోతుందీ జంట. నాగార్జున- రామ్ గోపాల్ వర్మ కలయికలో ఓ సినిమా తెరకెక్కుతుంది. మొన్ననే ఈ సినిమాకి క్లాప్ పడింది. ఈ సినిమాలో హీరోయిన్ ఇప్పుడు అనుష్క పేరు వినిపిస్తుంది. వర్మ చెప్పిన క్యారెక్టర్ కి నాగ్ అనుష్క పేరును సుచించాడట. ఈ విషయం అనుష్క దగ్గరికీ వెళ్ళింది. నాగ్ సినిమా అంటే అనుష్క నోటి నుండి ‘నో’ అనే మాట రాదు. సో.. వర్మ- నాగ్ సినిమాలో స్వీటీ ఫిక్స్ అయిపోయినట్లే. బాహుబలి తర్వాత అనుష్క ఒప్పుకున్న సినిమా అంటే కచ్చితంగా ఓ క్రేజీ ఎలిమెంటనే చెప్పాలి.
