బీహార్ ముఖ్యమంత్రిపై సీబీఐ విచారణకు సుప్రీంకోర్టు ఆదేశించింది. వసతి గృహాల్లో బాలికలపై అత్యాచారం కేసులకు సంబంధించి ముఖ్యమంత్రి నితీష్ కుమార్‌పై సీబీఐ విచారణ జరపాలని ‘పోస్కో’ ప్రత్యేక కోర్టు షాక్ ఆదేశాలు జారీ చేసింది. నితీష్ తో పాటు నిందితులైన ధర్మేంద్ర సింగ్, అతుల్ ప్రసాద్‌లపై సీబీఐ విచారణ జరగనుంది. బీహార్ లోని ముజఫర్ పూర్ లో.. వసతి గృహంలో జరిగిన ఘోరాలు దేశ వ్యాప్తంగా సంచలనం రేపాయి. బ్రజేష్ ఠాకూర్ అనే ఎన్జీవో ఆధ్వర్యంలో నడిచిన ముజఫర్ పూర్ షెల్టర్ హోంలో కీచక పర్వం అంతులేకుండా సాగింది. ముజఫర్ పూర్ వసతి గృహంలో ఏకంగా 40 మందికి పైగా బాలికలు అత్యాచారానికి గురయ్యారని నివేదిక బట్టబయలు చేసింది. దీంతో బీహార్ ప్రభుత్వం ఈ కేసును సీబీఐకి అప్పగించింది. కానీ ముజఫర్ పూర్ కేసులో అప్పట్లో మంత్రిగా ఉన్న మంజూ వర్మ భర్త ప్రమేయం కూడా ఉంది. దాంతో మంజూ వర్మ తన మంత్రి పదవికి రాజీనామా చేశారు.
ఈ కేసు విచారణ విషయంలో బీహార్ ప్రభుత్వం శ్రద్ధ చూపలేదు. దీనిపై సుప్రీంకోర్టు కూడా ఆగ్రహం వ్య్కతం చేసింది. బీహార్‌లోని వసతి గృహాలకు సంబంధించిన వివరాలను నితీష్ కుమార్ ప్రభుత్వం అందించడం లేదంటూ అంతకుముందు సుప్రీంకోర్టు ఆగ్రహం వ్యక్తం చేసింది. కొద్ది రోజుల క్రితం ఈ కేసు విచారణ జరుపుతున్న సీబీఐ అధికారి శర్మను బదిలీ చేయడంపై కూడా సీబీఐని కోర్టు మందలించింది. దీనిపై వివరణ ఇస్తూ అఫిడవిట్ సమర్పించాలని కూడా దర్యాప్తు సంస్థను సీజేఐ రంజన్ గొగోయ్‌తో కూడిన బెంచ్ ఆదేశించింది. ఇలా బదిలీ చేసినందుకు సీబీఐ మాజీ తాత్కాలిక డైరక్టర్ మన్నెం నాగేశ్వరరావును కోర్టు ధిక్కరణ చేసినట్లుగా ప్రకటించి ఓ రోజు కోర్టులో నిలబెట్టింది.రూ. లక్ష జరిమానా కూడా విధించింది.
బీహార్ లో ఉన్నది.. బీజేపీ – జేడీయూ సంకీర్ణ ప్రభుత్వం. సీబీఐ వారి చేతుల్లోనే ఉన్నారు కాబట్టి… ఇప్పటికిప్పుడు.. నితీష్ కుమార్ కు వచ్చిన సమస్యేమీ లేదు. కానీ.. సీబీఐ విచారణకు కోర్టు ఆదేశించినందున నైతిక బాధ్యతగా భావించి.. రాజీనామా చేయాలనే డిమాండ్లు విపక్ష పార్టీల నుంచి వస్తున్నాయి. కానీ.. నితీష్ దీన్ని పట్టించుకునే అవకాశం లేదు.
