హీరో నిఖిల్ కెరీర్ కు కార్తికేయ సినిమా ఓ టర్నింగ్ పాయింట్. స్వామిరారాతో ఓ ట్రాక్ లోకి వచ్చిన నిఖిల్, ఆ తరువాత కార్తికేయతో మార్కెట్ పెంచుకున్నాడు. చందు మొండేటి కూడా ఈ సినిమాతోనే టాలీవుడ్ కు దర్శకుడిగా పరిచయం అయ్యాడు. అందుకే ఆ ఇద్దరికీ ఆ సినిమా ప్రత్యేకం. ఆ సినిమాకు సీక్వెల్ చేయాలని ఇద్దరికీ చిరకాలంగా వుంది. ఇప్పటికి అది ఫైనల్ అయింది.
పీపుల్స్ మీడియా మేజర్ షేర్ తో నిర్మించే కార్తికేయ సీక్వెల్ మరో నెలా రెండు నెల్లలో ప్రారంభం అవుతుంది. సవ్యసాచి తరువాత చందు, అర్జున్ సురవరం తరువాత నిఖిల్ చేసే సినిమా ఇదే. కార్తికేయ సీక్వెల్ కు నిర్మాతలతో హీరో-డైరక్టర్ కలిసి బడ్జెట్ ఒప్పందం కుదుర్చుకున్నట్లు బోగట్టా. 15 కోట్లలో సినిమా ఫస్ట్ కాపీ తీసి ఇవ్వాలన్నది అగ్రిమెంట్ గా తెలుస్తోంది.
ఇదిలా వుంటే ఈ సినిమాకు కీరవాణిని సంగీత దర్శకుడిగా ఎంచుకున్నారు దర్శకుడు చందు మొండేటి. ఆయన ఇటీవల చేసిన సవ్యసాచి కి కూడా కీరవాణినే సంగీతం అందించారు. వాస్తవానికి బడ్జెట్ ప్రకారం సెట్ కాదు కానీ, సబ్జెక్ట్ విన్న కీరవాణి తాను రెండు పాటలు చేసి ఇస్తానని వాలంటరీగా ముందుకు వచ్చినట్లు తెలుస్తోంది. మరి మిగిలన పాటలు, బ్యాక్ గ్రవుండ్ స్కోర్ ఎవరు చేస్తారోచూడాలి.
