మహేష్ బాబు మంచి పెర్‌ఫార్మ‌ర్‌. అంద‌గాడు. ఓ గొప్ప స్టార్‌. తెర‌పై మహేష్ క‌నిపిస్తుంటే, చూపు తిప్పుకోలేం. కాక‌పోతే… అంత గొప్ప డాన్స‌ర్ అయితే కాదు. చ‌ర‌ణ్‌, బ‌న్నీ, ఎన్టీఆర్‌, రామ్‌, నితిన్ – వీళ్లంతా డాన్సుల్లో ఇర‌గ్గొట్టేస్తుంటారు. మహేష్ మాత్రం ఈ విష‌యంలో శ్ర‌మించ‌డు. కొన్ని సినిమాల్లో మహేష్ వేసిన స్టెప్పులు చూసి జ‌నం కూడా న‌వ్వుకున్నారు. బ్ర‌హ్మోత్స‌వంలో మహేష్ వేసిన స్టెప్పులు ట్రోలింగ్‌కీ గుర‌య్యాయి.
అయితే ఈసారి మహేష్ త‌న అభిమానుల‌కు డాన్స్ ఫీస్ట్ ఇవ్వ‌బోతున్నాడ‌ని తెలుస్తోంది. త‌న కొత్త సినిమా `స‌రిలేరు నీకెవ్వ‌రు`లో మహేష్ డాన్సులు కొత్తగా ఉండ‌బోతున్నాయ‌ట. సాధార‌ణంగా మహేష్ సినిమాల‌కు రాజు సుంద‌రం కొరియోగ్ర‌ఫీ అందిస్తుంటాడు. మహేష్ అన‌గానే కొన్ని బ్రాండెడ్ స్టెప్పులు ఉంటాయి. అవి వేయించేసేసి `మ‌మ` అనిపిస్తాడు రాజు సుంద‌రం. అయితే ఈసారి మాత్రం అలా కాదు. రాజు సుంద‌రంని ప‌క్క‌న పెట్టి మ‌రొక‌రికి అవ‌కాశం ఇచ్చాడ‌ట మహేష్. మ‌రీ ముఖ్యంగా ప్రీ క్లైమాక్స్‌కి ముందొచ్చే పాట‌లో మహేష్ స్టెప్పులతో అల‌రించ‌బోతున్నాడ‌ని తెలుస్తోంది. అదో మంచి మాస్ బీట్ అని, ర‌ష్మిక – మ‌హేష్‌ల మ‌ధ్య సాగే ఆ పాట‌లో మూమెంట్స్‌ స‌రికొత్త‌గా ఉండేలా చూసుకుంటున్నార‌ని తెలుస్తోంది. ద‌ర్శకుడు అనిల్ రావిపూడి కూడా ఓ మంచి డాన్స‌రే. త‌ను యువ హీరోల‌కు తీసిపోని విధంగా స్టెప్పులు వేస్తాడు. అందుకే మ‌హేష్‌తో కూడా ఈ సినిమాలో స్టెప్పులు వేయించాడ‌ట. మొత్తానికి మహేష్ ఫ్యాన్స్‌కి ఇది గుడ్ న్యూసే.
