ఆంధ్రప్రదేశ్ ప్రభుత్వం… హఠాత్తుగా ఆరు జీవోలను రద్దు చేసింది. ఇవన్నీ.. వేర్వేరు అంశాలకు సంబంధించినవయితే.. కామనేగా అనుకోవచ్చు. కానీ అన్నీ ఒక్క అంశానికి సంబంధించినవే. అవీ కూడా ముఖ్యమంత్రికి సంబంధించినవి. ఆయన ఇంటి కోసం.. రూ. కోట్లకు కోట్లు మంజూరు చేస్తూ.. ఇచ్చిన జీవోలు. వాటిపై జాతీయ స్థాయిలో చర్చ జరిగింది. ప్రజాధనం ఏంటీ.. ఇంత సులువుగా.. సొంతానికి వాడేసుకుంటున్నారన్న విమర్శలూ గట్టిగానే వచ్చాయి. వాటన్నింటినీ అప్పుడు ఏ మాత్రం పట్టించుకోని జగన్మోహన్ రెడ్డి… తాజాగా.. ఆ జీవోలన్నింటినీ రద్దు చేయమని అధికారులను ఆదేశించారు. ఆయన ఆదేశాలను జగన్ పాటించారు.
ఇంటి కిటికీలకు రూ. 73 లక్షలు మంజూరు చేసిన జీవో 259, ఫర్నీచర్ కొనుగోలు కోసం ఇచ్చిన జీవో 308, ఇళ్ల మెయిన్టనెన్స్ కోసం ఇచ్చిన జీవో 307, ఏసీలు ఇతర సదుపాయాల కల్పన కోసం ఇచ్చిన జీవో 254, లోటస్ పాండ్ సౌకర్యల కోసం ఇచ్చిన జీవో 160, కరెంట్ మెయిన్టనెన్స్ కోసం ఇచ్చిన జీవో 327లను రద్దు చేస్తూ ప్రభుత్వం నిర్ణయం తీసుకుంది. వీటికి సంబంధించి నిధులు ఏమైనా విడుదల చేసి ఉంటే.. వెనక్కి తీసుకుంటారు. విడుదల చేయకపోతే ఆపేస్తారు. ముఖ్యమంత్రికి తెలియకుండా.. ఆయన ఇంటికి నిధులను అధికారులు మంజూరు చేయరు. ఆన్నీ ఆయనకు తెలిసే ఉంటాయి. తెలిసి జరిగినా.. ఎందుకు రద్దు చేశారన్నది ఇప్పుడు ఆసక్తికరమైన అంశంగా మారింది.
ప్రజాధనం ఖర్చు పెట్టేది ఏదైనా ప్రభుత్వానికి చెందుతుంది. ఇప్పటి వరకూ ప్రైవేటు గృహాలకు… ప్రభుత్వ సొమ్మును వెచ్చించిన దాఖలాలు లేవు. అలా వెచ్చిస్తే.. ప్రభుత్వం మారిన తర్వాత వాటిని స్వాధీనం చేసుకుంటారు. జగన్మోహన్ రెడ్డి కిటీల కోసం వెచ్చించిన సొమ్ము.. ఇతర సౌకర్యాల కోసం వెచ్చినంచిన సొమ్ము.. ప్రభుత్వం మారిన తర్వాత.. రికవరీ చేసే అవకాశం ఉంది. దీన్ని వివాదాస్పదం చేయడం కూడా.. ఈ ప్రభుత్వమే నేర్పింది. కోడెల ఫర్నీచర్ కేసు దీనికి ఉదాహరణ. ప్రభుత్వం మారిన తర్వాత ఇలాంటి పరిస్థితులు వస్తాయన్న భయంతోనే…. జగన్మోహన్ రెడ్డి.. తన ఇంటికి ప్రజాధనంతో కల్పించుకున్న సౌకర్యాలన్నింటినీ వెనక్కి ఇచ్చేస్తున్నారని చెబుతున్నారు.
