తెలంగాణ సీఎం కేసీఆర్… తాను గురువుగా పూజించే చినజీయర్‌ను కలిసి.. కొండపోచమ్మసాగర్ ప్రారంభోత్సవానికి ఆహ్వానించారు. కేసీఆర్ ఆ ప్రాజెక్ట్ వేడుకను ప్రతిష్టాత్మకంగా తీసుకున్నారు. దానికి కారణం అది ఆయన సొంత గడ్డ సిద్ధిపేటలో ఉండటం మాత్రమే కాదు.. కొండపోచమ్మ సాగర్ ఓ అనితర సాధ్యమైన నిర్మాణం. ఇంజనీరింగ్ అద్భుతాల్లో ఒకటిగా కీర్తిస్తున్న కాళేశ్వరం ప్రాజెక్ట్ పరిధిలో అత్యధిక ఎత్తుకు గోదావరి జలాలను పంపింగ్‌ చేస్తుంది ఈ కొండ పోచమ్మ సాగర్ ప్రాజెక్ట్‌కే. శుక్రవారం కేసీఆర్ చేతుల మీదుగా ప్రారంభమయ్యే..ప్రాజెక్ట్‌లోకి గోదావరి నదిపై మేడిగడ్డ లక్ష్మీ బ్యారేజీ నుంచి వివిధ దశల ఎత్తిపోతల ప్రాజెక్ట్‌ల ద్వారా తరలించే నీరు 618 మీటర్ల ఎత్తులో ఉన్న కొండపోచమ్మ సాగర్ రిజర్వాయ్‌లోకి చేరనున్నాయి.
15 టీఎంసీల సామర్థ్యం కల్గిన కొండ పోచమ్మ సాగర్ నుంచి గ్రావిటీ ద్వారా నీరు కరువుప్రాంతాలను చేరనుంది. తమను చల్లగా చూసే దేవతగా కొండ పోచమ్మను కొలుస్తారు లక్షలాది మంది భక్తులు. సిద్దిపేట, మెదక్‌, మేడ్చల్‌, సంగారెడ్డి, యాదాద్రి …ఈ ఐదు జిల్లాల్లోని రెండు లక్షల 85 వేల ఎకరాలకు సాగునీటి అవసరాలతో పాటు, తాగునీటి అవసరాలు తీర్చే కొండ పోచమ్మ సాగర్ ప్రారంభోత్సవం సందర్భంగా..చండీయాగం, సుదర్శన యాగం, గంగమ్మ పూజలు నిర్వహించనున్నారు సీఎం కేసీఆర్. శుక్రవారం తెల్లవారుజాము నాలుగు గంటలకు ఏక కాలంలో కొండ పోచమ్మ దేవాలయంలో చండీయాగం, మర్కూక్‌లోని కొండపోచమ్మ సాగర్ పంపుహౌజ్ వద్ద సుదర్శన యాగం ప్రారంభమవుతాయి.
కరువు సీమలో అర కిలోమీటరు ఎత్తుకు గోదావరి పరవళ్లు తొక్కుతాయి. ఈ ప్రాజెక్ట్ ను పర్యాటక ఆకర్షణగా తీర్చిదిద్దాలని కేసీఆర్ పట్టుదలగా ఉన్నారు. ఈ మేరకు నిధులు కూడా కేటాయించారు. హైదరాబాద్‌కు 50 కిలోమీటర్ల దూరంలో ఉండడంతో కొండ పోచమ్మ రిజర్వాయర్‌ టూరిస్ట్‌ ప్లేస్‌ అయ్యే అవకాశాలు ఉన్నాయి. కేసీఆర్ దిశగా ప్రమోట్ చేయడానికి ప్రారంభోత్సవం నుండే ప్రయత్నాలు చేయబోతున్నారు.
