నేటి ట్రెండ్‌ని… నేటి ప్రేక్ష‌కుల నాడిని ప‌ట్ట‌లేక కెప్టెన్ కుర్చీకి దూర‌మైన సీనియ‌ర్ ద‌ర్శ‌కులు చాలామందే. ఒక‌ప్పుడు అగ్ర ద‌ర్శ‌కులుగా వెలిగిన వాళ్లంతా కూడా ఆ తర్వాత ప్రాభవాన్ని కోల్పోయారు. ప్రేక్ష‌కుల అభిరుచుల్లో వ‌చ్చిన మార్పులే కార‌ణం. కొద్దిమంది ర‌చ‌యిత‌లు కూడా అంతే. ఒక‌ప్పుడు స్టార్ రైట‌ర్‌గా వెలిగాడు చిన్నికృష్ణ. సమ‌ర‌సింహారెడ్డి, న‌ర‌సింహ‌నాయుడు, ఇంద్ర, న‌ర‌సింహ… త‌దిత‌ర బ్లాక్‌బ‌స్ట‌ర్ చిత్రాల‌కి క‌థ‌ల్ని అందించారు చిన్నికృష్ణ. అయితే ఆ మేజిక్‌ని అట్టే కొన‌సాగించ‌లేక‌పోయారు. `గంగోత్రి` తర్వాత ఆయ‌న్నుంచి చెప్పుకోద‌గ్గ క‌థ మ‌రొక‌టి రాలేదు. ఇప్పుడు ఎలాగైనా మ‌ళ్లీ ఫామ్‌లోకి రావాల‌నేది ఆయ‌న ప్ర‌య‌త్నం. అందుకోసం ఒక శ‌క్తివంత‌మైన క‌థ‌ని సిద్ధం చేశాడు. అది కూడా బాల‌కృష్ణ కోసం. బాల‌కృష్ణ – చిన్ని కృష్ణల‌ది స‌క్సెస్‌ఫుల్ కాంబినేషన్ అన్న విష‌యం తెలిసిందే. తాను మ‌ళ్లీ స‌క్సెస్ అందుకోవ‌డానికి బాల‌కృష్ణ అయితేనే బెట్ట‌ర్ అని భావించి చిన్నికృష్ణ క‌థ‌ని సిద్ధం చేశార‌ట. మరి ఆ చిత్రాన్ని ఎవ‌రు తెర‌కెక్కిస్తార‌న్న‌దే స‌స్పెన్స్‌. నిజానికి చిన్నికృష్ణ క‌థ‌ల్ని ఎక్కువ‌గా బి.గోపాల్ తెర‌కెక్కిస్తుంటారు. మరి ఈసారి కూడా ఈ కాంబినేష‌నే సెట్ కాబోతోందా అన్న‌ది చూడాలి.
