గ్రేటర్ హైదరాబాద్ ఎన్నికలు నవంబర్‌లో నిర్వహించాలన్న ఆలోచన టీఆర్ఎస్ సర్కార్ చేస్తున్నట్లుగా కనిపిస్తోంది.ఈ విషయంలో మంత్రి కేటీఆర్ స్పష్టమైన సంకేతాలను పార్టీ నేతలు ఇచ్చేశారు. జీహెచ్ఎంసీ కార్పొరేటర్లు, ఆ పరిధిలోని ఎమ్మెల్యేలతో సమావేశమయ్యారు. ఎన్నికలు ఒకటి రెండు నెలలు ముందే రావచ్చు.. అందరూ సిద్ధంగా ఉండాలని స్పష్టం చేశారు. అలాగే ప్రస్తుతం ఉన్న కార్పొరేటర్లకు చాలా మందికి మళ్లీ టిక్కెట్లు ఇవ్వడం లేదన్న విషయాన్ని కూడా పరోక్షంగా చెప్పారు. హైదరాబాద్‌లో టీఆర్ఎస్‌కు 99 మంది కార్పొరేటర్లు ఉన్నారు. ఇతర పార్టీల నుంచి వచ్చిన ఒకరిద్దరు కూడా ఉన్నారు.
అయితే.. వీరిలో చాలా మంది దందాలకు దిగి.. ప్రజల్లో చెడ్డ పేరు తెచ్చుకున్నారు. గతంలో కేటీఆర్ చాలా సార్లు కార్పొరేటర్లను హెచ్చరించారు. మరికొంత మందికి ఎమ్మెల్యేలతో సరిపడే పరిస్థితి లేదు. ఈ కారణంగా.. కేటీఆర్ కొంత మందిని పక్కన పెట్టాలని నిర్ణయించుకున్నట్లుగా కనిపిస్తోంది. 15 మంది కార్పొరేటర్ల పనితీరు మరీ దారుణంగా ఉందని.. పని తీరు మార్చుకోవాలని హెచ్చరించారు. ఆరేళ్లలో గ్రేటర్‌లో ఎన్నో అభివృద్ధి కార్యక్రమాలు చేపట్టామని వాటన్నింటినీ ప్రజల్లోకి తీసుకెళ్లాలని కేటీఆర్ సలహా ఇస్తున్నారు. ఇప్పటికే టీఆర్ఎస్ ఎన్నికల సన్నాహాలు తీవ్ర స్థాయిలో చేస్తోంది. తలసాని శ్రీనివాస్ యాదవ్.. డబుల్ బెడ్ రూం ఇళ్ల పేరుతో హడావుడి చేశారు.
అభివృద్ది పనుల్లో వేగాన్ని పెంచారు. మామూలుగా అయితే..వచ్చే ఏడాది ప్రారంభంలో గ్రేటర్ ఎన్నికలు జరగాల్సి ఉంది. రెండు, మూడు నెలలు ముందుగా నిర్వహించినా ముందస్తు ఎన్నికలు కావు. ఆరునెలలు ముందుగా నిర్వహించే అవకాశం ఉంటుంది. వీలైనంత త్వరగా గ్రేటర్ ఎన్నికలు పూర్తి చేయాలన్న లక్ష్యంతో కేటీఆర్ ఉన్నట్లుగా చెబుతున్నారు. ఇందులోనూ మెరుగైన ఫలితాలు సాధిస్తే.. ఆయన ప్రమోషన్‌కు తిరుగు లేకుండా ఉంటుందని అంటున్నారు.
