తెలుగునాట వంద కోట్లు సాధించిన సినిమాల్లో `ఎఫ్ 2` ఒక‌టి. దీనికి సీక్వెల్ గా `ఎఫ్ 3` రాబోతోంది. ఈ నెల‌లోనే ఈ సినిమా ప‌ట్టాలెక్క‌బోతోంది. అయితే ఈ సినిమాలో హీరోలెంత‌మంద‌న్నది ప్ర‌శ్న. ఎఫ్ 2లో వెంక‌టేష్‌, వ‌రుణ్ తేజ్ లు `కోబ్రా`లుగా న‌టించారు. ఎఫ్ 3లో ముగ్గురు హీరోలుంటార‌ని ముందు నుంచీ చెబుతూనే వ‌చ్చారు. ఎఫ్ 3లో ర‌వితేజ న‌టిస్తాడ‌ని ప్ర‌చారం జ‌రిగింది. ఓ ద‌శ‌లో మహేష్ బాబు పేరు కూడా వినిపించింది. సునీల్ అని కూడా అనుకున్నారు. ఇప్పుడు గోపీచంద్ పేరు మ‌ళ్లీ వార్త‌ల్లో వినిపిస్తోంది.
అయితే… ఈ సినిమాలో మూడో హీరోకి చోటు లేద‌ని తేలిపోయింది. ఈసారి కూడా వెంకీ, వరుణ్‌లే క‌నిపిస్తారు. ఎఫ్ 3 కోసం అనిల్ రావిపూడి రాసుకున్న స్క్రిప్టులో మరో కీల‌క‌మైన పాత్ర వుంది. అందులో హీరోనే న‌టించాలి. కానీ.. ఇప్పుడు దాన్ని తొల‌గించార‌ని స‌మాచారం. ఆ స్థానంలో ఓ మాజీ హీరోయిన్ ని రంగంలోకి దింపాల‌ని చూస్తున్నార్ట. విజ‌య‌శాంతి, రోజాలు చేయాల్సిన పాత్ర అద‌ని, ఓ ర‌కంగా ఆ పాత్రే మూడో హీరో అని తెలుస్తోంది. మూడో హీరోని దూరం పెట్ట‌డానికి కార‌ణం… బ‌డ్జెట్ ప‌రిమితులే. మూడో హీరో వ‌స్తే.. ఈ సినిమా బ‌డ్జెట్ మ‌రింత పెరుగుతుంది. అందుకే… ఆ పాత్ర‌ని ఇలా మార్చాల్సివ‌చ్చింది. అయితే ఈ సినిమాలో మాత్రం నలుగురైదుగురు హీరోయిన్లు క‌నిపిస్తార‌ని స‌మాచారం. ఓ ప్ర‌త్యేక గీతం కూడా ఉండ‌బోతోంద‌ని, అందులోనూ ఐటెమ్ గాళ్ గా ఓ ప్ర‌ముఖ హీరోయినే మెర‌వ‌నుంద‌ని తెలుస్తోంది.
