కాకినాడలో వైసీపీకి చెందిన కార్పొరేటర్‌ను ప్రత్యర్థి చంపిన వైనం ఒళ్ల గగుర్పొడిచేలా ఉంది. చచ్చే వరకూ వదిలి పెట్టకుండా కారుతో తొక్కించి చంపేశారు. ఆ కార్పొరేటర్ వైసీపీలో కీలక నేత. ఎమ్మెల్యే ద్వారంపూడి చంద్రశేఖర్ రెడ్డికి ముఖ్య అనుచరుడుగా పేరు పొందాడు. సెటిల్మెంట్ లు చేయడంలో ఆయనకు ప్రత్యేక శైలి ఉంది. అయితే.. ఆయన ఇప్పుడు అధికార పార్టీ. పైగా ద్వారంపూడి అనుచరుడు. అలాంటి గట్టి పొజిషన్‌లో ఉన్న కార్పొరేటర్‌నే నిర్భయంగా నడి రోడ్డుపై కావాలని తొక్కించి చంపేశారంటే… నేరస్తుల్లో చట్టాల పట్ల.. పోలీసుల పట్ల భయం పూర్తిగా పోయిందని నమ్మాల్సిన పరిస్థితి ఏర్పడుతుంది.
ఆంధ్రప్రదేశ్‌లో లా అండ్ ఆర్డర్ పరిస్థితులపై చాలా కాలంగా ఆరోపణలు వస్తున్నాయి. అయితే రాజకీయంగా టీడీపీ నేతలపై దాడులు చేస్తూంటే పోలీసులు ఊరుకున్నారు కానీ ఇతర అంశాల్లో సిన్సియర్‌ గా ఉన్నారని ప్రజలు సర్ది చెప్పుకోవాల్సిన పరిస్థితి. అయితే వైసీపీ నేతలు చే సే ప్రతీ అరాచకానికి టీడీపీ ముద్ర వేసి పని పూర్తి చేసుకుంటున్నారు. దీంతో ప్రజల్లో…పోలీసుల భయం కంటే… వైసీపీ నేతల భయమే ఎక్కువయింది.అయినప్పటికీ.. ఇటీవలి కాలంలో ఎలాంటి పరిస్థితులు మారలేదు. పట్టపగలు హత్యలు జరగడం కామన్ గా మారింది. ఇప్పుడు అది.. నడి రోడ్డుపై కారుతో తొక్కించి చంపే వరకూ వెళ్లింది.
నేర స్వభావం ఉన్న వారికి కొంచెం సందు ఇచ్చినా వారు చెలరేగిపోతారు. చట్టాలను చుట్టాలుగా మార్చుకుని .. అందర్నీ భయభ్రాంతులకు గురి చేస్తారు. అలాంటి పరిస్థితి ఒకప్పుడు బీహార్‌లో ఉండేది. ప్రజలు భయపడిపోయేవారు. అందుకే ఆ పరిస్థితిని జంగిల్ రాజ్‌గా చెప్పుకుంటూ ఉంటారు. లాలూ ప్రసాద్ యాదవ్ ఓడిపోవడానికి మళ్లీ అధికారం అందుకోవడానికి తంటాలు పడుతూండటం ఆ జంగిల్ రాజే కారణం. ఇప్పుడు ఆ పరిస్థితి ఏపీలో కనిపిస్తోంది.
