మరొక్క ఓటమి ఎదురైతే.. టీఆర్ఎస్ పనైపోయిందని విస్తృతంగా ప్రచారం జరుగుతుంది. అందుకే ఎమ్మెల్సీ ఎన్నికల విషయంలో సీఎం కేసీఆర్ స్వయంగా రంగంలోకి దిగాలని నిర్ణయించుకున్నారు. ప్రచారం చేయాలని భావిస్తున్నారు. ఎమ్మెల్సీ ఎన్నికలు జరుగుతున్నవి పట్టభద్రుల నియోజకవర్గానికి. బహిరంగసభలు ఏర్పాటు చేయడం సాధ్యం కాదు. ఓటర్లను నేరుగా కలవడం ఒక్కటే మార్గం. అయితే.. కేసీఆర్ అలా ఓటర్ల ఇళ్లకు వెళ్లి కలవడం సాధ్యం కాదు.. అదేమంత మంచి వ్యూహం కూడా కాదు కాబట్టి..కేసీఆర్ కొత్తగా ఆలోచించారు.. రోజు కొంత సమయం కేటాయించి.. ఓటర్లకు ఫోన్లు చేసి.. టీఆర్ఎస్ చేసిన పనులు వివరించి ఓటు వేయమని అభ్యర్థించబోతున్నారు.
ఎమ్మెల్సీ ఎన్నికల విషయంలో ఇప్పటికే పార్టీ వద్ద సంపూర్ణమైన డేటా ఉంది.ఓటర్ల లిస్ట్ ఉంది. వారిలో రోజూ విభిన్నవర్గాలకు చెందిన వారికి ఫోన్లు చేస్తే మంచి పలితం వస్తుందని భావిస్తున్నారు. ఇలా ఫోన్లు చేసి.. మాట్లాడటం అంటే కేసీఆర్ కు ప్రత్యేకమైన ఆసక్తి ఉంది.తాను గతంలో .. సంస్కరణలు చేపట్టాలనుకున్నప్పుడు.. రెవిన్యూ శాఖ సమస్యలపై.. వ్యవసాయ అంశాలపై ఫోన్లు చేసి మాట్లాడుతూ ఉంటారు. ఇప్పుడు అదే పద్దతిలో ఎమ్మెల్సీ ఎన్నికలకూ ప్రచారం చేస్తే మంచి ఫలితాలు వస్తాయని అనుకుంటున్నారు.
వరంగల్, ఖమ్మం, నల్లగొండ పట్టభద్రుల నియోజకవర్గానికి సంబంధించి కేసీఆర్ కు పెద్దగా టెన్షన్ లేదు. సిట్టింగ్ ఎమ్మెల్సీ పల్లా రాజేశ్వర్ రెడ్డి .. ఎలాగోలా గెలిచి వస్తారని నమ్ముతున్నారు. అయితే.. హైదరాబాద్, రంగారెడ్డి, మహబూబ్ నగర్ పట్టభద్రుల ఎమ్మెల్సీ స్థానంపైనే కేసీఆర్ కు టెన్షన్ ఉంది. అక్కడ పెద్దగా టీఆర్ఎస్ గెలిచింది లేదు. పైగా యువత అసంతృప్తిగా ఉంది. ఇలాంటి సమయంలో… కేసీఆర్ రంగంలోకి దిగాల్సిన పరిస్థితి. పైగా పీవీ నరసింహారావు కుమార్తెను నిలబెట్టారు. గెలిపించడానికి ప్రయత్నించకపోతే.. తాము అనుకున్న లక్ష్యం పూర్తిగా రివర్స్ అయ్యే ప్రమాదం ఉంది.అందుకే కేసీఆర్ రోజుకు కొంత సమయం ఓటర్లకు ఫోన్లు చేసేందుకు కేటాయించనున్నట్లుగా తెలుస్తోంది.
