బండి సంజయ్ ఏ మాత్రం మొహమాటలు పెట్టుకోవడం లేదు. ముందూ వెనుకా ఆలోచించడం లేదు. తన రాజకీయం తాను చేస్తున్నారు. యూపీలో జ్ఞానవాపి మసీదులో శివలింగం బయటపడిందని.. తెలంగాణలోనూ అదే వాదన తీసుకొస్తున్నారు. తెలంగాణలోనూ వేలాది ఆలయాలను గతంలో ధ్వంసం చేశారని, మసీదులు తవ్వితే శివలింగాలు బయటపడతాయన్నారు. తెలంగాణలోనున్న మసీదులను తవ్వి చూద్దాం… శవాలొస్తే మీవి…. శివం వస్తే మావి అందుకు మీరు సిద్ధమా?’ అని మజ్లిస్ చీఫ్‌కు సవాల్ చేశారు. కరీంనగర్ లో బండి సంజయ్ హిందూ ఏక్తా యాత్ర నిర్వహించారు. అందులో ప్రసంగిస్తూ ఈ వ్యాఖ్యలు చేశారు.
ఈ యాత్రలో దారుణమైన భాషను బండి సజయ్ వాడారు. బీజేపీకి అలవాటైన విధంగా ఓ వర్గాన్ని టార్గెట్ చేసుకుని రెచ్చగొట్టేలా మాట్లాడారు. తెలంగాణ రాష్ట్రంలో హిందూ సమాజాన్ని కాపాడాలని కరీంనగర్ ప్రజలు తనను పంపారని.. తెలంగాణకు పట్టిన శనిని కాషాయంతో తుడిచేసి రాష్ట్రాన్ని పవిత్రం చేసే బాధ్యతను తీసుకున్నానని ప్రకటించారు. కరీంనగర్ నడిబొడ్డున ఈద్గా … వేములవాడలో దర్గా పోవాలంటే రామరాజ్యం రావాల్సిందేనని సంజయ్ చెప్పుకొచ్చారు. ఇప్పటి వరకు కాశ్మీర్ ఫైల్స్ సినిమా చూశారు…. అతి త్వరలో రజాకార్ ఫైల్స్ సినిమా రాబోతోందని ప్రకటించారు.
ఉగ్రవాద శిక్షణా కేంద్రాలుగా మదర్సాలున్నాయని బండి సంజయ్ ఆరోపించారు. బీజేపీ అధికారంలోకి వస్తే అధికారిక భాషగా ఉన్న ఊర్దును శాశ్వతంగా రద్దు చేస్తామన్నారు. మదర్సాలను శాశ్వతంగా నిషేధించి.. మైనారిటీ రిజర్వేషన్లను పూర్తిగా తుడిచేస్తామని ప్రకటించారు. రాబోయే రోజుల్లో హిందువులకు ప్రమాదం పొంచి ఉంది. అందుకే ప్రతి ఒక్క హిందువు కలిసి కట్టుగా సాగాలని పిలుపునిచ్చారు. అధికారం కోసం బండి సంజయ్ .. చాలా దూకుడుగా ఉన్నారని ఈ వ్యాఖ్యలతో అర్థమవుతోందని రాజకీయవర్గాలు అంచనా వేస్తున్నాయి.
