మందు బాబుల నుంచి ఏటా రూ. ఇరవ వైల కోట్ల ఆదాయం వస్తుందని చెప్పి లిక్కర్ బాండ్లను వేలం వేసి రూ. ఎనిమిది వేల కోట్లకుపైగా భారీ వడ్డీకి అప్పు తెచ్చుకున్న ఏపీ ప్రభుత్వంపై విమర్శలు పెరిగిపోతున్నాయి. మద్య నిషేధం హామీ ఇచ్చి ఇప్పుడు మద్యం ద్వారా ఆదాయం మాత్రమే తెచ్చుకుంటామని చెబుతున్న వైనంపై అన్ని పార్టీల నేతలే కాదు.. సామాన్య ప్రజలూ విమర్శలు గుప్పిస్తున్నారు. ఇదేం పద్దతని ప్రశ్నిస్తున్నారు. మాటతప్పిన రాజకీయనేత రాజీనామా చేసి పోయేలా రాజకీయం మారుస్తానని ఆయన పాదయాత్ర సభల్లో దీర్ఘాలు తీస్తూ చెప్పిన మాటల్ని గుర్తు చేస్తున్నారు.
తెలుగుదేశం , జనసేన పార్టీలు లిక్కర్ బాండ్ల అమ్మకంపై విరుచుకుపడుతున్నాయి. పవన్ కల్యాణ్ కూడా జగన్ తీరును ఎద్దేవా చేశారు. అన్ని వైపుల నుంచి ప్రశ్నలు దూసుకొస్తున్నా… వైసీపీ నేతలు మాత్రం నోరు మెదపడం లేదు. సమర్థించుకోవడం కష్టం కాబట్టి.. ఏదో విధంగా ఈ ఇష్యూలో వీలైనంత వరకూ సైలెంట్‌గా ఉంటే చాలని అనుకుంటున్నట్లుగా తెలుస్తోంది. తాము స్పందిస్తే ఇంకా ఎక్కువ చర్చ జరుగుతుందని అలా జరిగితే తమకే నష్టమని అంచనా కు వస్తున్నారు. అయితే తాము స్పందిచకపోతే.. ప్రజల్లోకి తప్పుడు సంకేతాలు వెళ్తాయని కొంత మంది వైసీపీ నేతలు ఆందోళన చెందుతున్నారు.
మద్యం రేట్ల విషయంలో మందు బాబులే.. కాదు మద్యం అలవాటు ఉన్న వారి కుటుంబాల్లోనూ తీవ్ర అసంతృప్తి వ్యక్తమవుతోంది. తమ సంపాదనలో చాలా భాగం మద్యం రూపంలో ప్రభుత్వమే తీసుకుంటోందని అసంతృప్తి వ్యక్తం చేస్తున్నారు. మద్యాన్ని నిషేధిస్తామని .. తమ కుటుంబాల్ని బాగు చేస్తామని చెప్పి.. ఇప్పుడు మద్యంతోనే తమ ఆదాయాలను పిండుకునే ప్రయత్నం చేసి… తమ కుటుంబాలను మరింత దారుణంగా ముంచేస్తున్న వైనంపై వారిలో అసంతృప్తి పెరిగిపోతోంది. దీనికైనా వైసీపీ నేతలు సమాధానం చెప్పాల్సి ఉంటుంది.
