`ఎఫ్ 3` త‌ర‌వాత అనిల్ రావిపూడి సినిమా నంద‌మూరి బాల‌కృష్ణ తో ఫిక్సయిన సంగ‌తి తెలిసిందే. అయితే.. ఇప్ప‌టి వ‌ర‌కూ.. ఈ సినిమా సెట్స్‌పైకి వెళ్ల‌లేదు. దానికి రెండు కార‌ణాలున్నాయి. ఒక‌టి.. బాల‌య్య `వీర సింహారెడ్డి`తో బిజీగా ఉన్నాడు. రెండోది.. రావిపూడి కూడా స్క్రిప్టుని పూర్తి స్థాయిలో సిద్ధం చేయ‌లేదు. బాల‌య్య సెకండాఫ్‌లో…కొన్ని మార్పులు చేర్పులూ సూచించ‌డంతో ఆ ప‌నిలో బిజీగా ఉండిపోయాడు. ఎట్ట‌కేల‌కు ఇప్పుడు స్క్రిప్టు సిద్ధమైంది. షూటింగ్‌కి కూడా ముహూర్తంది దొరికింది.
డిసెంబ‌రు 9 నుంచి… బాల‌య్య – రావిపూడి సినిమా ప‌ట్టాలెక్క‌బోతోంది. బాల‌య్య కూడా 9నే.. సెట్లోకి అడుగుపెట్ట‌బోతున్నాడ‌ని టాక్‌. `వీర సింహారెడ్డి` సంక్రాంతికి విడుద‌ల అవుతున్న సంగ‌తి తెలిసిందే. షూటింగ్ కూడా దాదాపుగా పూర్తి కావొచ్చింది. రావిపూడి సినిమాలో బాల‌య్య గెట‌ప్ కూడా స‌రికొత్త‌గా ఉండ‌బోతోంద‌ని టాక్‌. ఈ సినిమా పూర్తిగా బాల‌య్య స్టైల్ లోనే యాక్ష‌న్ మోడ్ లో ఉండ‌బోతోంద‌ట. అయితే రావిపూడి స్టైల్ ఆఫ్ కామెడీ కూడా మిక్స్ చేశాడ‌ట. మొత్తానికి బాల‌య్య ఫ్యాన్స్‌కి ఈ సినిమా విందుభోజ‌నంగా తీర్చిదిద్ద‌డానికి రావిపూడి అన్ని క‌స‌ర‌త్తులూ పూర్తి చేసేశాడు.
