స‌మంత అనారోగ్యంతో… `ఖుషి` సినిమాకి బ్రేకులు ప‌డిన సంగ‌తి తెలిసిందే. విజ‌య్ దేవ‌ర‌కొండ క‌థానాయ‌కుడిగా శివ నిర్వాణ ద‌ర్శ‌క‌త్వంలో రూపొందుతున్న సినిమా ఇది. డిసెంబ‌రులో విడుదల కావాల్సింది. అయితే.. స‌మంత అనారోగ్యంతో షూటింగ్ నిర‌వ‌ధికంగా వాయిదా ప‌డింది. 50 శాతం షూటింగ్ మాత్ర‌మే అయ్యింది. స‌మంత మ‌ళ్లీ సెట్స్‌పైకి ఎప్పుడొస్తుందో తెలియ‌ని సందిగ్థంలో.. `ఖుషి` సినిమా ఊగిస‌లాడింది. అయితే ఇప్పుడు ఈ సినిమాకి సంబంధించిన అప్ డేట్ వ‌చ్చేసింది. ఖుషి షూటింగ్ త్వ‌ర‌లోనే మొద‌ల‌వుతుంద‌ని ద‌ర్శ‌కుడు శివ నిర్వాణ ప్ర‌క‌టించాడు. ఫిబ్ర‌వ‌రిలో స‌మంత డేట్లు ఇచ్చింద‌ట. విజ‌య్ కూడా సెట్లోకి అడుగుపెట్ట‌బోతున్నాడు. ఫిబ్ర‌వ‌రిలో చ‌క చ‌క షూటింగ్ ముగించాల‌ని చిత్ర‌బృందం ప్ర‌య‌త్నిస్తోంది. స‌మంత ఈ సినిమా కోసం మరో 25 రోజులు కేటాయించాల్సివుంది. ఫిబ్ర‌వ‌రి మొత్తం ఈ సినిమాకే ఇచ్చేస్తే స‌రి. లేదంటే మార్చిలో మరో షెడ్యూల్ ఉంటుంది. అన్నీ అనుకొన్న‌ట్టు జ‌రిగితే ఈ వేస‌విలో `ఖుషి` చూడొచ్చు.
‘ఖుషి’…. మ‌ళ్లీ మొద‌లు
