ముగ్గురు, నలుగురు టిక్కెట్లు చినిగిపోతాయని సీఎం జగన్ కేబినెట్ సమావేశంలోనే మంత్రుల్ని హెచ్చరించారు. ఆ తర్వాతి రోజే ఎవరెవర్ని తీసేస్తారు.. ఎవరెవర్ని తీసుకుంటారు అనే లీకులు కూడా సజ్జల క్యాంప్ నుంచి వచ్చాయి. దీంతో ఎమ్మెల్సీల్లో కొత్త మంత్రులు ఉన్నారని వారికి శుభాకాంక్షలు ప్రారంభమయ్యాయి. ఊస్టింగ్ లిస్టులో పేరున్న మంత్రులపై జాలి చూపులు కూడా ఎదురయ్యాయి. అయితే ఆ కేబినెట్ సమావేశం తర్వాత పరిస్థితి మారిపోయింది. ఎమ్మెల్సీ ఎన్నికల కౌంటింగ్ జరిగింది. ఎమ్మెల్యే కోటా ఎమ్మెల్సీ ఎన్నికలు జరిగాయి. ఇప్పుడు వైసీపీలో పరిస్థితి నివురుగప్పిన నిప్పులా మారింది.
దీంతో సీఎం జగన్ ఇప్పుడు మంత్రులటిక్కెట్లు చింపడం కన్నా పెద్ద తప్పిదం మరొకటి ఉండదని అనుకుంటున్నట్లుగా తెలుస్తోంది. పదే పదే మంత్రివర్గాన్ని మారుస్తున్నారని జనం అనుకోడంతో పాటు మంత్రి పదవులు రాని వారు.. తీసేసిన వారు చేసే రచ్చను తట్టుకోవడం కష్టమనే అంచనాకు వచ్చారు. ప్రస్తుతం గతంలోలా పరిస్థితులు లేవు. ఓ ఏడాది క్రితం జగన్మోహన్ రెడ్డిని పల్లెత్తు మాట అనే పరిస్థితి లేదు. కానీ ఇప్పుడు సగం మంది ఎమ్మెల్యేలు రగిలిపోతున్నారని.. తమ రాజకీయ జీవితాల్ని నాశనం చేశారని అనుకుంటున్నారన్న గుసగుసలు వినిపిస్తున్నాయి. అసలు ఎమ్మెల్యేలం అనే మాటే కానీ.. కనీస గౌరవం రాలేదని వారు రగిలిపోతున్నారు.
అదే సమయంలో ప్రభుత్వ వ్యతరేకత ఉద్ధృతంగా ఉందని.. వేరే దారి చూసుకోవడం మంచిదన్న అభిప్రాయంలో ఎక్కువ మంది ఉన్నారని చెబుతున్నారు. అలాంటి పరిస్థితి ఉంటే మంత్రివర్గ మార్పు చేర్పులు అనేది పెద్ద బ్లండర్ అవుతుందని ఇప్పటికే వ్యూహకర్తలు భావిస్తున్నారు. అయితే సీఎం జగన్ ఐ ప్యాక్ , సజ్జల మాయలో ఉన్నారని.. వారేం చెబితే అదే చేస్తారని అంటున్నారు. మొత్తంగా వారు కూడా ఇప్పుడు ఒత్తిడి ఎదుర్కొంటున్నారు. ఈ పరిస్థితుల్లో ఏ మంత్రుల టిక్కెట్లు చించే ధైర్యం సీఎం జగన్ చేయకపోవచ్చునని వైసీపీ వర్గాలు ఓ అభిప్రాయానికి వచ్చాయి.
