తెలంగాణ సర్కారు చేపడుతున్న అనేక అనేక కార్యక్రమాలలో ఇవాళ కీలకమైన ముందడుగు పడబోతోంది. గోదావరి నది మీద తెలంగాణ సర్కారు నిర్మించ దలచుకుంటున్న కొత్త ప్రాజెక్టులకు సంబంధించి ఇవాళ మహారాష్ట్ర ముఖ్యమంత్రి ఫడ్నవీస్ తో తెలంగాణ ముఖ్యమంత్రి కేసీఆర్ కీలకమైన ఒప్పందం మీద సంతకం చేయబోతున్నారు. గోదావరి జలాలను తెలంగాణ ఉపయోగించుకోవడానికి సంబంధించి ఇది చాల కీలకమైన ముందడుగు. ఆంధ్ర పాలకులు ఎలినంత కాలమూ తెలంగాణ సమగ్ర అభివృద్ధి గురించి పట్టించుకోలేదంటూ తెరాస పోరాట సమయం నుంచి చేసిన అనేకానేక ఆరోపణలకు ఇప్పుడు జరుగుతున్నది ఒక నిదర్శనం అని కూడా అనుకోవచ్చు.
మన రాష్ట్రం మన పాలన అనే నినాదం తో అధికారం లోకి వచ్చిన తెరాస, ‘మన పాలన’ అంటే అర్ధం ఏమిటో ఇలాంటి చర్యల ద్వారా ప్రజలకు నిరూపించబోతున్నది. అందుకే… ఈ ఒప్పందం తరువాత ప్రాజెక్టులు కార్యరూపంలోకి కూడా వస్తే గనుక ప్రజలు కెసిఆర్ ను దేవుడిలా నెత్తిన పెట్టుకుంటారనడంలో ఎలాంటి సందేహం లేదు. ఇప్పటికే కెసిఆర్ ప్రకటిస్తున్న అనేక సంక్షేమ పథకాలు ఆ పార్టీకి ప్రజాదరణను పెంచుతున్నాయి. ఏ ఎన్నికలు జరిగినా తెరాస తిరుగులేని మెజారిటీతో గెలవడం మనం గమనిస్తూనే ఉన్నాం. ఈ ప్రాజెక్టులు కూడా కార్యరూపంలోకి వస్తే ఇక పార్టీకి గొప్ప విజయం అని చెప్పాలి.
ఇన్ని దశాబ్దాలుగా మన రాష్ట్రం ఉమ్మడిగా ఉన్న రోజుల్లో గోదావరి జలాలు వృధాగా సముద్రం పాలవుతున్నాయని అందరూ ఆవేదన చెందారు. పోలవరం లాంటి ఆలోచనలు వచ్చాయే తప్ప, తెలంగాణలో భౌగోళికంగా గోదావరి జలాలను సమర్థంగా వినియోగించుకునే అవకాశం లేదని అంత అంటూ వచ్చారు. గోదావరి జలాల వినియోగంలో తెలంగాణకు కొన్ని ఇబ్బందులు ఉన్న మాట వాస్తవమే అయినప్పటికీ సరైన సంకల్పం ఉంటే అది అసాధ్యం మాత్రం కాదని తెరాస సర్కారు నిరూపిస్తోంది. ఇదంతా కేవలం ‘మన పాలన’ వలన మాత్రమే సాధ్యమవుతున్న విషయం అని వారు చెబితే తప్పేముంది. అందుకే ఈ విజయం దక్కితే ఆ పార్టీ కి ప్రజాదరణ అమాంతం పేరుగుతుందనడం లో ఎలాంటి సందేహం లేదు.
ఈ ప్రాజెక్టులు కార్యరూపం దాల్చడంలో మంత్రి హరీష్ రావు చాల కీలక పాత్ర పోషించారు. అనేక దఫాలుగా మహారాష్ట్రకు వెళ్లి అక్కడి ప్రభుత్వ అధికారులతో చర్చలు జరిపి, ఒప్పందాలను ఈ దశ వరకు తీసుకు వచ్చారు. ఒక రకంగా చెప్పాలంటే… తన అధికారిక కార్యాలయం అయిన సెక్రటేరియెట్ లో కంటే, అధికారిక నివాసం అయిన సీఎం క్యాంపు ఆఫీస్ కంటే.. తన ‘తోట బంగాళా’ అదేనండి ఫామ్ హౌస్ లొనే ఎక్కువ సమయం గడపడానికి ఇష్టపడే కెసిఆర్ వంటి ముఖ్యమంత్రికి ఒక వైపు హరీష్ రావు, మరొక వైపు కేటీర్ వంటి సమర్థులైన నాయకులూ అండగా ఉండడం చాల గొప్ప అడ్వాంటేజ్ అనుకోవాలి.
