రాజ‌మౌళి మెగాఫోన్ ప‌ట్టాక, మేకింగ్ స్టైలే కాదు, ప్ర‌మోష‌న్ స్ట్రాట‌జీలు కూడా పూర్తిగా మారిపోయాయి. `బాహుబ‌లి`, `ఆర్‌.ఆర్‌.ఆర్‌` కోసం జ‌క్క‌న్న వేసిన ప‌బ్లిసిటీ ఎత్తులకు బాలీవుడ్ మేధావులు కూడా చిత్త‌యిపోయారు. ఓ హాలీవుడ్ సినిమాని మార్కెటింగ్ చేసిన స్థాయిలో త‌న చిత్రాన్ని జ‌నంమ‌ధ్య‌లోకి తీసుకెళ్లాడు రాజ‌మౌళి. ఓ సినిమాకు ఇలాక్కూడా ప‌బ్లిసిటీ చేయొచ్చా? అని అంతా ఆశ్చ‌ర్య‌పోయారు. ఇప్పుడు ఆ అడుగుజాడ‌ల్లోనే మిగిలిన వాళ్లు న‌డుస్తున్నారు. మంచు విష్ణు కూడా ప్ర‌మోష‌న్ ప‌రంగా రాజ‌మౌళినే ఫాలో అవుతున్నాడు.
విష్ణు త‌న కెరీర్‌లోనే ప్ర‌తిష్టాత్మ‌కంగా నిర్మిస్తున్న చిత్రం.. `క‌న్న‌ప్ప`. ఇప్ప‌టికే ఈసినిమాని స్టార్ల‌తో నింపేసి, ఫోక‌స్ పెంచాడు. ప్ర‌మోష‌న్స్ కూడా వినూత్నంగా చేసేందుకు రంగం సిద్ధం చేసుకొంటున్నాడు. `క‌న్న‌ప్ప` పై ఓ పుస్త‌కాన్ని ప్రింట్ చేయించాడు విష్ణు. 16 పేజీల గ‌ల ఈ ఫ‌స్ట్ వాల్యూమ్‌లో భ‌క్త కన్న‌ప్ప‌కు సంబంధించిన అన్ని విష‌యాల్నీ పొందుప‌రిచారు. ఈ పుస్త‌కాన్ని అన్ని భాష‌ల్లోనూ అనువ‌దించి, స్థానికంగా క‌న్న‌ప్ప విశేషాలు తెలిసేలా చేస్తారు. అలా.. ఈ సినిమాకు వ‌చ్చేవాళ్ల‌కు క‌న్న‌ప్ప‌పై ఓ స్ప‌ష్ట‌మైన అవ‌గాహ‌న వ‌స్తుంది. ఇదీ…. విష్ణు స్ట్రాట‌జీ. దీంతో పాటుగా క‌న్న‌ప్ప‌లోని న‌టీన‌టుల‌కు సంబంధించిన యానిమేష‌న్ చిత్రాలు కూడా రూపొందించాల‌ని ప్ర‌ణాళిక‌లు ర‌చిస్తున్నారు.
