ఎన్టీఆర్ స్మార్ట్ టౌన్‌షిప్‌లలో ప్లాట్ల కేటాయింపు కోసం ఆంధ్రప్రదేశ్ ప్రభుత్వం కొత్త విధానాలను అమలు చేయనుంది. గత ప్రభుత్వం రాష్ట్రవ్యాప్తంగా 36 ఎంఐజీ స్మార్ట్ టౌన్‌షిప్‌లను ప్రారంభించింది. కానీ ఈ టౌన్‌షిప్‌లు ఎంఐజీకి మాత్రమే పరిమితమయ్యాయి. కొత్త కూటమి ప్రభుత్వం ఈ టౌన్‌షిప్‌లను ఎన్టీఆర్ స్మార్ట్ టౌన్‌షిప్‌లుగా పేరు మార్చి, ఆర్థిక స్తోమత కలిగిన ఎవరైనా వేలంలో పాల్గొనేందుకు అవకాశం కల్పించేందుకు వార్షిక ఆదాయ పరిమితిని ఎత్తివేయాలని నిర్ణయించింది.
గతంలో ప్లాట్ల కేటాయింపు లాటరీ విధానం ద్వారా జరిగేది, కానీ ఈ విధానం లోపభూయిష్టంగా ఉండటం వల్ల ప్రజలు ఆసక్తి చూపలేదు. లాటరీలో ఏ ప్లాట్ వస్తుందో తెలియకపోవడం, వాస్తు ప్రకారం సరిపడకపోవడం వంటి సమస్యలు ఉన్నాయి. కొత్త సిఫార్సు ప్రకారం, ప్లాట్లను నంబర్ల వారీగా వేలం వేయనున్నారు. ఇష్టమైన ప్లాట్‌ను ముందుగా చూసుకుని, వేలంలో పోటీపడి కొనుగోలు చేయవచ్చు. వేలంలో పాల్గొనేవారు ప్రాథమిక విలువలో 10 శాతం చెల్లించాలి.
గతంలో లాటరీ ద్వారా కేటాయించిన ప్లాట్లలో మౌలిక సదుపాయాలు లేకపోవడం వల్ల కొనుగోలుదారులు ఇబ్బందులు ఎదుర్కొన్నారు. చాలా టౌన్‌షిప్‌లు పిచ్చిమొక్కలతో నిండి ఉన్నాయి, ప్లాట్ల స్థానం గుర్తించడం కష్టంగా ఉంది. కొత్త వేలం విధానం ద్వారా వచ్చే నిధులతో ఈ ప్రాజెక్టుల్లో పట్టణాభివృద్ధి సంస్థలు మౌలిక సదుపాయాలు కల్పించి, కొనుగోలుదారుల్లో విశ్వాసం నింపనున్నాయి.
కూటమి ప్రభుత్వం సీనియర్ అధికారులతో కమిటీ ఏర్పాటు చేసి, టౌన్‌షిప్‌లను పునరుద్ధరించేందుకు తీసుకోవాల్సిన చర్యలను చర్చించారు. త్వరలోనే అధికారికంగా మార్గదర్శకాలు జారీ చేయనున్నారు.
