నానిని ఇప్పుడు బుల్లి హీరోలా చూడకూడదు. అప్ కమింగ్ స్టార్ హీరో కేటరిగిలో నాని ఎప్పుడో చేరిపోయాడు. అతని సినిమాకి రూ.30 కోట్లు కొల్లగొట్టగల స్టామినా ఉందని ఇది వరకే నిరూపితమైంది. ఓవర్సీస్ లో నానికి తిరుగులేకుండా పోతోంది. మిలియన్ డాలర్ల క్లబ్ లో నాని సినిమాలు ఈజీగా చేరిపోతున్నాయి. వరుస విజయాలతో తన ఇమేజ్, మార్కెట్ రోజు రోజుకీ పెంచుకొంటున్నాడు. తన తాజా చిత్రం మజ్ను ఈ వారమే ప్రేక్షకుల ముందుకు వస్తోంది. అయితే.. మజ్నుకి సంబంధించిన ప్రమోషన్స్ మాత్రం డల్గా సాగుతున్నాయి. అసలు ఈ సినిమా వస్తోందన్న సడే లేదు. నాని సినిమా మరీ బజ్ లేకుండా రిలీజ్కి సిద్దం అవ్వడం ఈమధ్య కాలంలో ఇదే తొలిసారేమో. నాని సూపర్ ఫామ్లో ఉన్నాడు కదా, పబ్లిసిటీ లేకపోయినా నడిచిపోతుందిలే అనే ధీమా నిర్మాతలకు ఉందేమో? ఓవైపు జాగ్వార్ లాంటి డబ్బింగ్ సినిమాలు ప్రమోషన్లతో హోరెత్తించేస్తోంటే, మజ్ను చప్పుడు చేయకపోవడం ఆశ్చర్యపరుస్తోంది.
మజ్ను పబ్లిసిటీ విషయంలో నాని కూడా నిరాశగానే ఉన్నాడట. ఇదే విషయమై నిర్మాతలో గట్టిగా మాట్లాడాడట కూడా. ప్రమోషన్లు మీరు చేస్తారా, నన్ను చేసుకోమంటారా? అని నాని నిలదీయడంతో… సడన్గా తేరుకొన్న నిర్మాతలు బుధవారం నుంచి ప్రమోషన్ల స్పీడు పెంచాలని చూస్తున్నారు. సెన్సార్ టాక్ కాస్త డల్గా ఉండడంతో చిత్రబృందం కాస్త నిరాశకులోనయ్యిందని అందుకే ప్రమోషన్లపై దృష్టి నిలపడం లేదని తెలుస్తోంది. మజ్నుకి పోటీగా ఏ సినిమా లేకపోవడంతో మజ్ను బృందం ధీమాగా ఉందని, అందుకే పబ్లిసిటీ పట్టించుకోవడం లేదని, రిలీజ్ తరవాత టాక్ని బట్టి పబ్లిసిటీ విషయంలో వ్యూహం మార్చే అవకాశం ఉందని తెలుస్తోంది.