క్రికెట్ ప్లేయర్‌గా, కెప్టెన్‌గా ధోనీ టాలెంట్‌ని తక్కువ చేసే ప్రయత్నం ఎవ్వరూ చేయలేరు కానీ ఆటతో పాటు ధోనీకి ఇంకో అద్భుతమైన టాలెంట్ కూడా ఉంది. 1983లో కష్టపడి వరల్డ్ కప్ గెలిచిన కపిల్ అండ్ కో సంపాదించుకుంది ఏమీ లేదు. క్రికెట్‌ని పాపులర్ చేయడంలో మాత్రం వాళ్ళ కష్టం చాలా చాలా ఉంది. ఇండియాలో ఓ క్రికెట్ ప్లేయర్ ఏ రేంజ్‌లో సంపాదించుకోవచ్చు అన్న విషయాన్ని ప్రాక్టికల్‌గా చేసి చూపించాడు సచిన్ టెండూల్కర్. ప్రపంచంలోనే ది బెస్ట్ బ్యాట్స్‌మేన్‌గా పేరు తెచ్చుకోవడంతో పాటు ప్రపంచంలో ఉన్న క్రికెటర్స్ అందరికంటే కూడా ఎక్కువ సంపాదించుకున్న క్రికెటర్‌గా కూడా టెండూల్కర్ పేరు గడించాడు. అయితే అద్భుతమైన టాలెంట్ ఉండి కూడా దాదాపుగా దశాబ్ధం పైగానే ఆడిన టెండూల్కర్ ఎంత సంపాదించాడో అంత డబ్బులను చాలా తక్కువ టైంలోనే సంపాదించేశాడు ధోనీ. బ్రాండ్ ఇమేజ్‌ని పెంచుకోవడంలో మిగతా క్రికెటర్స్ అందరి కంటే కూడా ధోనీ చాలా చాలా ముందున్నాడు. తనకు పేరు ఎక్కువ వచ్చేలా చేసుకోవడంలో కూడా ధోనీకి చాలా తెలివితేటలు ఉన్నాయి. 2011 వరల్డ్ కప్ ఫైనల్‌లో యువరాజ్ సింగ్‌ను కాదని తనే ముందు దిగడంలోనే ధోనీ తెలివితేటలు తెలిసిపోతున్నాయి. కానీ మీడియా రిలేషన్స్ విషయంలో తన పలుకుబడిని ఉపయోగించి తన స్వార్థం గురించిన విమర్శలు మరీ ఎక్కువ రాకుండా చూసుకోవడంలో సక్సెస్ అయ్యాడు ధోనీ.
ఇప్పుడు సినిమా ఐడియా కూడా ధోనీదే అని తెలుస్తోంది. రిటైర్మెంట్‌కి దగ్గరవుతున్న ఈ సమయంలో తన పేరు శాశ్వితంగా నిలబడిపోవాలంటే ఇండియా మొత్తం రిలీజ్ అయ్యేలా తన జీవిత కథతో సినిమా రూపొందితే బాగుంటుందని భావించాడు ధోనీ. తనకు సన్నిహితుడు అయిన అరుణ్ పాండేతో తన ఆలోచన పంచుకున్నాడు ధోనీ. ఆ తర్వాత మిగతా వ్యవహారాలన్నీ అరుణ్ పాండేనే చూసుకున్నాడని తెలుస్తోంది. ‘ఎం.ఎస్. ధోనీ’ సినిమాకు అరుణ్ పాండే సహ నిర్మాతగా కూడా వ్యవహరిస్తున్నాడు. ఇప్పుడు సినిమా పబ్లిసిటీ కోసం కూడా సినిమా డైరెక్టర్, హీరోల కంటే ధోనీనే ఎక్కువ కష్టపడుతున్నాడు. స్టార్ హీరోలు వాళ్ళ సినిమాల గురించి చెప్పుకున్నట్టుగా ‘ధోనీ’ సినిమా గురించి చాలా గొప్పగా చెప్పేస్తున్నాడు. క్రికెట్ ప్రేమికులకు, విశ్లేషకులకు కూడా తెలియని ఎన్నో విషయాలు సినిమాలో ఉన్నాయని చెప్తూ సినిమా పైన ఆసక్తి పెంచే ప్రయత్నం చేస్తున్నాడు. కెరీర్ స్టార్ట్ చేసినప్పటి నుంచి కూడా బ్రాండ్ వ్వాల్యూ పెంచుకోవడం, ఎండార్స్‌మెంట్స్ విషయంలో ధోనీ తెలివితేటల గురించి అవగాహన ఉన్నవాళ్ళందరూ కూడా ఈ సినిమాను కచ్చితంగా ధోనీనే ప్రొడ్యూస్ చేసి ఉంటాడని అభిప్రాయపడుతున్నారు. ఇప్పుడు సినిమా పబ్లిసిటీ కోసం ధోనీ పడుతున్న తాపత్రయం చూస్తుంటే కూడా అది నిజమేననిపిస్తోంది.
