వచ్చేసింది బతుకమ్మ పండుగ వేళ. ఇక తొమ్మిది రోజులూ తెలంగాణ పల్లెల్లో ఆనందాల వేడుక. రంగు రంగుల పూలతో బతుకమ్మ ఆటపాటల సందడి. ఆడపడుచులకు ఆనంద పారవశ్యం. బతుకమ్మ పండుగ అంటే ఒక స్ఫూర్తి. ఒక ఆనవాయితీ. బతుకులో ఆనందాన్ని నింపే ఓ అత్యద్భుత సందర్భం.
తెలంగాణలో అనాదిగా వస్తున్న సంప్రదాయం బతుకమ్మ పండుగ. ఈరోజు నుంచి దసరా వరకూ యావత్ తెలంగాణలో ఆనంద తాండవం కనిపిస్తుంది. ప్రజల్లో సంతోషాల ఛాయలుకనిపిస్తాయి. ఏడాది పొడుగునా ఎన్ని కష్టాలున్నా, ఈ తొమ్మిది రోజులూ మహిళలు ఎంతో సంతోషంగా ఆడిపాడతారు. వారి మోముల్లో కొత్త జీవకళ కనిపిస్తుంది. ఒక్కమాటల చెప్పాలంటే, ఆనందానికి కేరాఫ్ అడ్రస్ గా బతుకమ్మ పండుగను చెప్పవచ్చు. ఈరోజుల్లో పరిస్థితి వేరు. ఒకప్పుడు తెలంగాణ పల్లెలుల దొరల పాలనలో మగ్గేవి. అప్పట్లో స్వేచ్ఛ తక్కువ. నిర్బంధం ఎక్కువ. అలాంటి రోజుల్లో బతుకమ్మ పండుగ ఒక్కటే, ఆడపడుచులు ఆనందంగా గడిపే సందర్భంగా ఉండేది.
మహాలయ అమావాస్య నాడు మొదలై దుర్గాష్టమినాడు ముగిసే తొమ్మిది రోజుల పండుగ ఇది. సద్దుల బతుకమ్మతో ఈ సంబురాలు సమాప్తమవుతాయి. బతుకమ్మలను పేర్చడానికి పువ్వులను ఎక్కడి నుంచో తేవాల్సిన అవసరం లేదు. కొనాల్సిన అవసరం అంతకంటే లేదు. ప్రతి పల్లెలో ఎక్కడైనా దొరికే పూలతోనే రంగురంగుల బతుకమ్మలను పేరుస్తారు.
గడ్డిపూలు, తంగేడు, గునుగు, తామరపువ్వు, బంతి, చామంతి, బీరపువ్వు.. ఇలాంటి వాటితో బతుకమ్మలను పేరుస్తారు. బతుకమ్మ పాటల్లో బతుకు బాగుండాలనే అభిలాష ఉంటుంది. భక్తి భావన ఉంటుంది. కష్టాలను మర్చిపోదామనే స్ఫూర్తి ఉంటుంది. ఆత్మ విశ్వాసంతో ముందుకు సాగుదాం అనే సందేశం ఉంటుంది. బతుకమ్మ ఆడిన తర్వాత ఊరి చెరువులోనే నిమజ్జనం చేస్తారు. ఆ తర్వాత సత్తుపిండి, పిండివంటలు పరస్పరం ఇచ్చిపుచ్చుకోవడం, సామాజిక సహజీవనానికి సంకేతం.
బతుకమ్మ పండుగ అంటే ప్రకృతికి దగ్గరగా ఉండటం. అంతా సమిష్టిగా కలిసిమెలిసి ఉండటం. కష్టాలను పక్కనబెట్టి సంతోషంగా సంబురాలు జరుపుకోవడం. అందుకే, తెలంగాణ పల్లెజనం అత్యంత సంతోషంగా గడిపేది ఈ సీజన్ లోనే. అందుకే, బతుకమ్మ అంటే తెలంగాణ మహిళలకు ఇష్టం. ప్రాణం.
