వెనుక ఎంత పెద్ద బ్యాక్ గ్రౌండ్ ఉన్నా, ఒక‌టి రెండు సినిమాల వ‌ర‌కే! ఆ త‌ర‌వాత ఎవ‌రి కాళ్ల మీద వాళ్లు నిల‌బ‌డాల్సిందే, నిరూపించుకోవాల్సిందే. ఆ త‌రుణం.. ఇప్పుడు ఆశీష్‌కి వ‌చ్చేసింది. దిల్ రాజు కుటుంబం నుంచి వ‌చ్చి, హీరో అయ్యాడు ఆశీష్. ‘రౌడీ బోయ్స్‌’ కోసం దిల్ రాజు పెద్ద ఎత్తున ఖ‌ర్చు పెట్టినా, భారీగా ప్ర‌చారం చేసినా వ‌ర్క‌వుట్ అవ్వ‌లేదు. ఆ త‌ర‌వాత ‘సెల్ఫిష్’ అనే సినిమా మొద‌లెట్టారు. అది మ‌ధ్య‌లోనే ఆగిపోయింది. ఇప్పుడు ఆశీష్ నుంచి ‘లవ్ మి’ వ‌స్తోంది.
ఇదో హార‌ర్ సినిమా. కీర‌వాణి, పీ.సి.శ్రీ‌రామ్ లాంటి మేటి టెక్నీషియ‌న్లు ప‌నిచేశారు. ‘బేబీ’తో పేరు తెచ్చుకొన్న వైష్ణ‌వి క‌థానాయిక. సెట‌ప్ బాగానే ఉంది. టీజ‌ర్‌, ట్రైల‌ర్ ఆక‌ట్టుకొన్నాయి. మ‌రి… ఇవ‌న్నీ ఆశీష్ ని హీరోగా నిల‌బెట్ట‌డానికి ఏమాత్రం స‌హ‌క‌రిస్తాయ‌న్న‌ది పెద్ద ప్ర‌శ్న. హార‌ర్ జోన‌ర్ కూడా ఇప్పుడు క‌ష్టాల్లో ఉంది. ఈమ‌ధ్య ఈ జోన‌ర్ పెద్ద‌గా క్లిక్ అవ్వ‌డం లేదు. కాకపోతే.. ఒక్క‌సారి ప‌ట్టేస్తే – రూపాయికి ప‌ది రూపాయ‌లు తీసుకొచ్చే స్టామినా ఈ జోన‌ర్‌కు ఉంది. ఆశీష్‌తో పాటు హార‌ర్ సినిమాల‌కు కూడా ‘లవ్ మి’ యాసిడ్ టెస్ట్ గా నిల‌వ‌బోతోంది. గ‌త రెండు నెల‌లుగా బాక్సాఫీసు ద‌గ్గ‌ర పెద్ద‌గా చ‌ప్పుడు క‌నిపించ‌డం లేదు. ఎన్నికల సీజ‌న్‌, ఐపీఎల్ వేడితో… బాక్సాఫీసు కాస్త చ‌ల్ల‌బ‌డిపోయింది. ఈ రెండింటి ప్ర‌భావం ఇంకా క‌నిపిస్తూనే ఉంది. వీటి మ‌ధ్య ‘లవ్ మి’ ఎలా నిల‌దొక్కుకుంటుందో చూడాలి.
