రామ్ క‌థానాయ‌కుడిగా, బోయ‌పాటి శ్రీ‌ను ద‌ర్శ‌క‌త్వంలో ఓ చిత్రం రూపుదిద్దుకొంటున్న సంగ‌తి తెలిసిందే. ఇటీవ‌లే క్లాప్ కొట్టారు. లింగుస్వామి ద‌ర్శ‌క‌త్వంలో రూపుదిద్దుకుంటున్న`ది వారియ‌ర్` పూర్తి కాగానే, బోయ‌పాటి సినిమా రెగ్యుల‌ర్ షూటింగ్ మొద‌లుకానుంది. అయితే ఈ కాంబోకి సంబంధించిన ఆస‌క్తిక‌ర‌మైన వార్త ఒక‌టి బ‌య‌ట‌కు వ‌చ్చిందిప్పుడు.
రామ్ – బోయ‌పాటి సినిమాలో బాలయ్య కూడా క‌నిపించ‌బోతున్నాడ‌ట. అయితే… ఆయ‌నేం ఈ సినిమాలో న‌టించ‌డం లేదు. కాక‌పోతే, ఆయ‌న ప్ర‌స్తావ‌న ఈ సినిమాలో ఉండ‌బోతోంద‌ట. `జై బాలయ్య` నినాదం బాలయ్య అభిమానుల‌కు ఇష్టం. బాలయ్య ఉన్నా, లేక‌పోయినా… జై బాలయ్య అనే పేరు ఓ మంత్రంలా జ‌పిస్తుంటారు. బాలయ్య అభిమానుల‌కు న‌చ్చేలా.. ఈ సినిమాలో `జై బాలయ్య` నినాదాల‌తో మార్మోగిపోయేలా ఈ సినిమాలో ఓ ఎపిసోడ్ ని రూపొందించ‌నున్నాడ‌ట బోయ‌పాటి. ఈ సినిమాలో రామ్.. బాలయ్య అభిమానిగా క‌నిపించ‌నున్నాడ‌ని, ఓ స‌న్నివేశం మొత్తాన్ని బాలయ్య రిఫ‌రెన్సుల‌తో.. నింపేశాడ‌ని… ఆ సీన్‌కు గూజ్‌బ‌మ్స్ రావ‌డం ఖాయ‌మ‌ని స‌మాచారం అందుతోంది. ఇది వ‌ర‌కు వెండి తెర‌పై చాలా మంది హీరోలు బాలయ్య అభిమానులుగా క‌నిపించారు. అయితే ఇక్క‌డ ఈ సీన్‌ని డిజైన్ చేసింది బోయ‌పాటి. ఆయ‌న బాల‌య్య‌కు వీరాభిమాని. త‌ను త‌న హీరోని ఎలా చూపిస్తాడో ప్ర‌త్యేకంగా చెప్పాల్సిన ప‌నిలేదు. పైగా బాలయ్య అభిమానిగా మార్చేస్తే… ఇక హ‌ద్దులుండ‌వు. మ‌రి ఈసారి బోయ‌పాటి ఎలాంటి మ్యాజిక్ చేస్తాడో చూడాలి
